AILEU, 15 maiu 2023 (TATOLI) – Xefe Departementu Implementasaun Projetu hosi Ministériu Edukasaun Juventude no Desportu (MEJD), Alfaredo Mali Ati Gama, hateten projetu komunitáriu hamutuk 59 mak seidauk finaliza.
“Ita-nia Governu preve tinan ne’e aloka osan Millaun $20 hodi konstrui eskola 200-resin, hahú hosi pre-eskolar to’o sekundária inklui eskola tékniku vokasionál iha teritóriu nasionál ne’ebé jere rasik husi komunidade sira no husi projetu hirak ne’e hamutuk 143 mak foin daudauk inagura ona hosi ita-nia Primeiru-Ministru ho simbolikamente iha Maliana no hela projetu komunitáriu hamutuk 59 mak sei iha prosessu konstrusaun”, Alfaredo Mali Ati Gama, hateten ba jornalista sira iha Administrasaun Munisípiu Aileu, segunda ne’e.
Nia husu ba komunidade sira tau matan ba fasilidade ne’ebé mak Governu ingura ona no entrega ona komunidade sira.
“Husu komunidade sira tenke kuidade eskola pré-eskolár, sekundária no tékniku vokasionál ne’ebé Governu entrega ona, fasilidade sira ne’e ita-nia Governu halo hodi fasilita ita oan sira atu eduka oan sira no prodúz rekursu uma ne’ebé kulifikadu iha futuru”, nia rekomenda.
Nia hatutan, konstrusaun eskola no fasilidade sira ne’e konstrui liuhosi programa projetu komunitáriu, komunidade mak nain ba projetu ne’e.
“Ita mak tenke iha obrigasaun bo’ot atu kuida no tau matan hodi labele estraga fasilidade eskolár, nune’e oan sira bele utiliza ba prosesu aprendizajen”, Alfaredo Mali Ati Gama informa.
Antes ne’e, Diretór interinu Edukasaun Munisípiu Aileu, Miguel Moniz Pires, dehan iha munisípiu Aileu, eskola sira ne’ebé tama ba projetu komunitáriu hamutuk 13, kompostu hosi pré- ekolár rua ida iha Mantane no ida iha Seloi-Kraik inklui Ensinu Báziku neen mak finaliza ona nia obra no hosi MJED rasik entrega ona ba kordenadór eskola sira atu tau matan ba eskola sira ne’e.
Iha eskola lima mak agora daudaun sei iha hela faze konstrusaun, tempu badak finaliza konstrusaun no Governu liuhosi MEJD sei entrga ba kordenadór eskola ida atu tau matan.
Jornalista: Natalino Costa
Editór : Zezito Silva
