DILI, 15 maiu 2023 (TATOLI)—Embaxadór Reinu Unidu ba Timor-Leste (TL), Owen Jenkins, hateten Reinu Unidu prontu apoiu Timor-Leste nia adezaun ba ASEAN.
“Ha’u Embaixadór Reinu Unidu ba Timor-Leste iha oportunidade hakarak hasoru malu ho Prezidente Repúblika, ami mai hakarak rona no hato’o ami-nia vizaun oinsá apoiu Timor-Leste ninia dezenvolvimentu iha aspeitu oioin no tempu oin mai liu-liu adezaun Timor nian ba ASEAN no área saida mak presiza apoiu hosi Reinu Unidu ba Timor,” Embaixadór Reinu Unidu ne’e hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, segunda ne’e.
Nia dehan, ninia misaun ikus nu’udar Embaixadór Reinu Unidu iha TL kontinua apoiu entre nasaun rua nia relasaun diplomátiku no relasaun nasaun rua la’o dezde Timor-Leste ukun an.
“Ida-ne’e mak ohin diskute ho Prezidente Repúblika, hakarak apoiu liu Timor-Leste liu-liu edukasaun labarik sira no hasa’e nutrisaun ba labarik, no dezenvolvimentu rekursu umanu. Ohin, Prezidente mós ko’alia kona-ba númeru dezempregu barak oinsá ita haree ida-ne’e,” nia dehan.
Durante sorumutu, Xefe Estadu hato’o hodi enkoraja Governu Reinu Unidu no husu nafatin kontribuisaun Reinu Unidu atu apoiu TL, no lilu-iu ba demokrásia ne’ebé daudaun iha períodu eleisaun parlamentár, nune’e ba oin oinsá haree relasaun diplomátiku nasaun rua nian.
Jornalista : Nelson de Sousa
Editór : Cancio Ximenes
