STAE Liquiça : Parpol 12 la partisipa iha empakotementu materiál ElPar 2023
LIQUIÇA, 15 maiu 2023 (TATOLI)– Partidu Polítiku (Parpol) 12 la marka prezensa iha loron dahuluk empakotementu materiál eleisaun ne’ebé hala’o iha Sekretariadu Tékniku Administrasaun Eleitór (STAE) Munisípiu Liquiça.
Diretór STAE Munisípiu Liquiça, Mario dos Santos Martins informa durante ne’e haruka ona karta ba Parpol sira ne’ebé nia sede konsentra iha Liquiça no kontinua halo kontaktu mós ba sira ne’ebé sede laiha atu mai marka prezensa iha empakotementu refere.
“Ami hein to besik tuku 10:00 ona sira la mai. Ami manda ona karta ba sira ne’ebé sede iha no sira laiha ami halo kontaktu maibe ohin sira la mai kompletu. Maibé sira atu marka prezensa ou lae, hakarak ka lakohi empakotementu tenke lao tuir orariu,” Mario dos Santos Martins dehan iha STAE Munisípiu Liquiça, segunda ne’e.
Nia esplika, empakotementu ne’e ho objetivu hodi halo identifikasaun ba buletim votu sira karik iha balun ne’ebé hetan estragu, fískais partidu politiku presiza anota no bainhira la konsidera sei tau karimbu la uza, nune’e labele mosu dezentendimentu entre ofisíal STAE no fískais Parpol durante hala’o prosesu Eleisaun Parlamentar (ElPar) 2023 iha sentru votasaun sira.
Parpol sira ne’ebé la marka prezensa mak hanesan Partido do Desenvolvimento Nacional (PDN) ho nomeru sorteiu ida (1), Partido Liberta Povo Aileba (PLPA – 2), Partido os Verdes de Timor (PVT – 6), União Democrática Timorense (UDT – 7), Partido Republicano (PR – 9), Unidade Nacional da Democrática da Resistência Timorense (UNDERTIM – 10).
Nomos, Partidu Frente Revolucionária de Timor-Leste Independente (FRETILIN – 11), Centro Ação Social Democrata Timorense (CASDT – 13), Movimento da Libertação do Povo Maubere (MLPM – 14), Partido Socialista Timorense (PST – 15), Partido Democrata Cristão (PDC – 16), no Associação Popular Monarquia Timorense (APMT – 17).
Partidu sira ne’ebé marka prezensa mak hanesan Partido da Libertação Popular (PLP – 3), Partido Democrático (PD – 4), Kmanek Haburas Unidade Nacional Timor Oan (KHUNTO – 5), Partido da Unidade de Desenvolvimento Democrático (PUDD – 8), no Congresso Nacional de Reconstrução de Timor-Leste (CNRT – 12).
“Ami hanesan orgaun eleitoral ladun satisfaz ho Partidu Politiku sira tanba karta ne’ebé ami hasai ba sira la konsidera. Tanba, sira ne’ebe sede laiha ami kontaktu direita, ami prepara hotu kedas,” Diretór STAE Munisípiu Liquiça, Mario dos Santos Martins deklara ninia lamentasaun.
Parte seluk, Diretór CNE (Komisaun Nasionál ba Eleisaun) Munisípiu Liquiça, Celistiano Xavier mos preokupa ho Parpol sira ne’ebé la marka prezensa no husu ba sira tau importánsia ba empakotementu material eleisaun nune’e evita dezentendimentu ka lamentasaun iha ElPar ne’ebé sei halao iha 21 maiu 2023.
“Ohin loron Parpol ituan deit mak partisipa tuir lolos Parpol tenke tau ida ne’e hanesan importansia, tanba hakarak ka lakohi sira tenke iha prezensa maximu hodi nune’e evita lamentasaun ruma ne’ebé ikus mai atu kestiona, hodi garantia bulletin ne’e sura los ou lae? Keta iha koak ka foer ruma karik, sei karik akontese Parpol sira bele iha reklamasaun,” nia hateten.
Celistiano Xavier konsidera Parpol ne’ebé la partisipa iha empakotementu ne’e la organizadu ka iha preparasaun diak hodi asegura prosesu hotu ba ElPar 2023.
STAE Liquiça simu ona material eleisaun iha loron 12 maiu 2023 ho total kaixa 11 (Boot 10, Kiik 1) ho livru iha 1182 ne’ebé kontein buletim votu hamutuk 59.100.
Munisípiu Liquiça iha sentru votasaun 85, estasaun votu 106, Eleitór hamutuk 53,084 ne’ebé kompostu husi Postu Adminitrativu tolu (3), no Suku 23.
Tuir observasaun husi Tatoli ba empakotementu material ElPar 2023 ba loron dahuluk iha parte dader ne’e realiza ona ba sentru votasaun 31 husi suku sia (9) iha postu Administrativu Bazartete.
Prosesu empakotementu ne’e rasik hetan partisipasaun maximu husi missaun observasaun sira hanesan Resistência Nacional dos Estudantes de Timor-Leste (RENETIL), Justiça e Paz e Integridade da Criação – Observador da Igreja Para os Assuntos Sociais (JPIC – OIPAS) no CNE.
Jornalista : Cidalia Fátima
Editora : Armandina Moniz
