STAE Manatuto rejista eleitór elizivél 36.547 partrisipa eleisaun parlamentár
MANATUTO, 15 maiu 2023 (TATOLI)—Diretór Sektretariadu Tékniku Administrasaun Eleitorál (STAE) Manatuto, Mariano Natalino Soares, STAE Manatuto rejista eleitór elizivel 36.547 ne’ebé mak sei partisipa eleisaun parlamentár ne’ebé sei realiza iha 21 maiu 2023.
“Eleitór eleizivél hamutuk 36.547 ne’ebé kompostu hosi mane 18.719 no feto 17.828, ida-ne’e inklui ona ema ho defisiénsia sira no mós eleitór foun iha territóriu Manatuto nian ne’ebé elizivél atu vota,” nia hateten ba Tatoli liuhosi telefónika, segunda ne’e.
Númeru eleitór refere, rekolla hosi postu administrativu Barique hamutuk 4.605, ostu Laclo 6.124, postu Laclubar 9.445, postu Laleia 3.102, postu Manatuto Vila iha 10.677 no postu administrativu Soibada hamutuk 2.594.
Nia dehan STAE Manatuto iha ona eleitór elizivel no daudaun ne’e preparadu atu ezekuta aktu eleitorál.
“Ami preparadu ona atu ezekuta aktu eleitorál iha Manatuto. No, ami mós prepara hotu ona material sensitivu no naun sensitivu hodi transporta ba sentru no estasaun votasaun sira iha postu suku no aldeia sira iha 20 maiu agora,” nia hateten.
Ba eleisaun parlamentár 2023 ne’e, nia hateten, iha Manatuto ne’e sentru votasaun hamutuk 83 no estasaun votasaun iha 98.
Maske nune’e, nia nafatin preokupa ba estrada balun iha postu Laclo, Laclubar ne’ebé ninia kondisaun aat hela, tanba bainhira udan la monu rai ne’e komunidade bele asesu dalan ne’e ho di’ak maibé bainhira udan monu rai mak sei difikulta komunidade nia movimentu atu partisipa iha eleisaun parlamentár ne’e.
Jornalista : Osória Marques
Editór : Cancio Ximenes
