OÉ-CUSSE 15 maiu 2023 (TATOLI) – Partidu Libertasaun Populár (PLP) lideradu Jenerál Taur Mata Ruak, promete investe maka’as ba setór agrikultura no kria kondisaun dignu ba Ofisiál Polísia Suku (OPS).
Prezidente PLP, Taur Mata Ruak, hato’o programa ne’e liuhosi kompromisu eleitorál, ne’ebé hala’o iha Palaban, sub-rejiaun Pante Makasar, segunda ne’e.
“Durante ha’u-nia mandatu, situasaun defisil tebes tanba situasaun COVID-19 ita labele halo buat barak, PLP manán, primeiru hakarak aumenta osan ba setór agrikultura, atu dezenvolve peska agro-pekuária, turizmu, ita tenke tau millaun ida, depois finansia programa agrikultura sira-ne’e atu hadi’a ekonomia rai laran,” Prezidente Partidu PLP, Taur Mata Ruak hateten.
Notísia relevante: PLP sei haforsa setór produtivu hasa’e produtividade ekonómia Timor-Leste
Programa PLP nian mak polítika oinsá hakiak animál, nune’e Governu sei harii empreza Estadu nian ida, atu serbisu hamutuk ho komunidade sira.
Notísia relevante: PLP hakarak transforma Batugade sai interpostu komersiál
“Ita-nia hanoin no ita-nia hakarak mak ita-nia nasaun labele hamlaha, entaun iha futuru tenke investe osan maka’as,” nia katak.
Aliende setór agrikultura, Partidu Libertasaun Popular prioritiza Ofisiál Polísia Suku (OPS), bainhira PLP lidera tán Governu da-sia, hakarak hadi’a fatin no hadi’a moris OPS iha suku.
“Ita hakarak hadi’a fatin ba polísia komunitária sira iha suku. Programa PLP hakarak hadi’a sira-nia moris, tanba sira kada loron moris hamutuk ho komunidade sira iha suku no aldeia, atu ajuda rezolve problema iha suku, entaun ita tenke hadi’a sira-nia moris no fatin dignu ba sira,”nia promete.
Notísia relevante: PLP konsidera diversifikasaun ekonomia iha setór tolu
Durante Partidu Libertasaun Popular hala’o kampaña iha Oé-Cusse, situasaun la’o di’ak no kontroladu tanba hetan seguránsa másimu hosi Polísia Nasionál Timor-Leste (PNTL), hetan mós observasaun hosi Komisaun Nasionál Eleisaun (CNE, sigla portugés) no Provedoria Direitu Umanu no Justisa (PDHJ).
Entretantu, totál eleitór elijível atu partisipa eleisaun iha loron 21 fulan maiu tinan 2023 iha Oé-Cusse 54.291, komposta hosi mane 27.681 no feto 26.610, no sentru votasaun 80 no estasaun votasaun 115 estabelese ona iha territóriu Oé-Cusse.
Jornalista: Abílio Elo Nini
Editor: Evaristo Soares Martins
