AILEU, 16 maiu 2023 (TATOLI) – Administradór Interinu Munisípiu Aileu, Felis Maria de Oliveira, hateten iha 20 maiu tuku 15:00 loraik, autoriedade munisipál hamtuk ho órgaun eleitorál sira no Komandu PNTL sei desloka materiál sensentivu no la sensitivu ba Postu Administrativu sira iha Aileu to’o sentru votasaun no estasaun votu sira ne’ebé STAE prepara ona.
“Ita deside dader, tuir tiha atividade loron nasionál isár bandeira restaurasaun independénsia 20 maiu no loraik ita hotu bele ba asiste serimónia dezlokasaun materiál sensitivu no la sensitivu ba postu administrativu sira to’o sentru votasaun no estasaun votu sira iha Munisípiu Aileu ne’ebé STAE estabelese ona”, Felis Maria de Oliveira dehan.
“Tanba ita hatene Timor-Leste, tinan ne’e hasoru eventu importante rua, ida mak serimónia isár badeira ba komemorasaun loron restaurasaun 20 maiu no eventu eleisaun parlamentár”, nia informa.
Nia haktuir, desizaun Estadu nian, hanesan sidadaun no ajente administrasaun Estadu nian tenke prontu atu organiza no asegura eventu demókratiku ne’e bele la’o ho susesu.
“Husu entidade hotuhotu tenke marka prezensa iha serimónia ida ne’e tanba serimónia ida ne’e importante ba ita hotu ne’ebé hanesan ajente administrasaun liuliu ba sira ne’ebé ezerse funsaun iha eventu importante eleisaun parlamentár”, nia hakotu.
Jornalista: Natalino Costa
Editór : Zezito Silva
