ERMERA, 15 maiu 2023 (TATOLI) – Cooperativa Café Timor (CCT), halo ona reabilitasaun kafé hamutuk ektare 200 iha munisípiu Ermera hodi hasa’e hikas produsaun plantasaun kafé ne’ebé mak tuan ona.
Reabilitasaun plantasaun kafé realiza ho orsamentu Governu atuál liu husi Ministeriu Agriukultura no Peskas (MAP) ho montante $6.4, hodi halo reabilitasaun ba plantasaun kafé iha Ermera no munisípiu seluk.
“Programa reabilitasaun kafe ne’ebé mak trasa husi Prezidente Repúblika, Ramos Horta no Primeiru Ministru Taur Matan Ruak, iha tinan kotuk, no liu husi serbisu hamutuk ho CCT, ita rehabilita ona plantasaun kafé ektare 200 iha munisípiu Ermera laran tomak. Ita hetan projetu ne’e husi MAP,” José Almeida dos Santos, Supervizór Prosesamentu Fábrika CCT, Railako Ermera, ba Tatoli, iha nia knaar fatin, Railako, Munisípiu Ermera, segunda ne’e.
Alende Ermera, CCT mós reabilita ona kafé ektare 100 iha Aileu, 100 iha Liquiça, 100 iha Ainaro, no 100 iha Manufahi.
“Entaun, husi munisípiu lima ne’e, ita halo reabilitasaun kaf’e ektare 600. Entaun rehabilitasaun ita kobre ona Ermera, Liquiça, Ainaro, Aileu no Manufahi. Ekipa husi MAP no CCT tun ona ba terenu hodi haree reabilitasaun plantasaun kafé sira ne’e iha terenu. Ekipa tékniku sira tun direta hodi haree plantasaun sira no selu ona 40% ba kafekultór sira ne’ebé ofrese sira-nia plantasaun ba reabilitasaun,” nia esplika
Tuir programa reabilitasaun, kafekultór sira sei simu $300 resin kada ektare bainhira kompleta reabilitasaun.
Entertantu projetu reabilitasaun ba plantasaun kafé realiza husi CCT no Asosiasaun Café Timor (ACT).
Programa reabilitasaun kafé nu’udar esforsu governu atuál no Prezidente Repúblika nian atu hasa’e hikas produsaun kafé.
Alende reabilitasaun, CCT mós kada tinan distribui kafé-oan no ai-mahon kafé ba kafekultór iha munisípiu Ermera hodi troka kafé tuan no ai-mahon ne’ebé mak tohar ona.
Jornalista: Filomeno Martins
Editora: Nelia Borges
