DILI, 16 maiu 2023 (TATOLI) – Partidu Kongresu Nasionál Rekonstrusaun Timor-Leste (CNRT) husu Komisaun Nasionál ba Eleisaun (CNE, sigla portugés) no Polísia Nasionál Timor-Leste (PNTL) atu kontrola partidu polítiku sira seluk ne’ebé la kumpre regra eleitorál no foti medida ida rigoroza hasoru sira, liuhosi prosesu penál.
Portavós no Koordenadór Polítika Esterna, Roberto Soares, husu ba CNE no PNTL atu toma responsabilidade ba hahalok irresponsabilidade sira ne’ebé komete hosi partidu balun, tanba lori materiál no osan hodu bosok povu atu hetan votu.
“Partidu CNRT halo ona identifikasaun no rekolla hela dadus balun kona-ba entidade govermentál balun maka halo hela asaun karidade hodi tun bá baze fahe sasán atu vota ba sira-nia partidu. Iha nasaun Repúblika Demokrátika Timor-Leste ne’e laiha sidadaun ka partidu ida maka hamriik iha lei nia leten”, Roberto Soares afirma iha konferénsia imprensa ne’ebé hala’o iha Bairro dos Grilhos, tersa ne’e.
Nia salienta iha inísiu períodu kampaña eleitorál, CNRT sempre relata liuhosi konferénsia imprensa hodi atualiza ba públiku insidente no irregularidade ne’ebé akontese iha nivel aldeia, suku, postu no munisípiu ne’ebé komete hosi partidu adversáriu sira. “Maibé parte autoridade sira tantu CNE no Polísia la fó reasaun séria no ezemplár hodi kontinua husik asaun irregularidade sira ne’e akontese”.
Nune’e Partidu CNRT lamenta tebes ba pozisaun imparsialidade husi CNE no PNTL sira tanba eziste krime eleitorál no pekulatu ne’ebé komete husi forsa polítika balun, tanba kontinua uza karreta Estadu bá kampaña hodi fahe hela sasán ba populasaun sira ho objetivu atu hetan votu.
Nia realsa mós katak mosu irregularidade seluk maka partidu adversáriu sira la kumpre oráriu kampaña, maibé CNE no PNTL durante ne’e la halo atuasaun. “Loloos ne’e kampaña ba partidu polítiku ida termina iha 18h30, maibé Governu ne’e kria hela atividade espozisaun iha fatin sira iha Dili ho intensaun atu konsentra populasaun sira hodi hala’o kampaña eleitorál”, dehan.
“Nune’e CNRT dala ida tan husu ba eleitór sira atu bainhira indíviduu ka entidade governementál ruma bá entrega sasán ka osan ruma ho intensaun atu vota ba sira-nia partidu tenke hato’o keixa imediata ba PNTL no CNE atu sira bele halo kedan atuasaun hodi prende indíviduu ka grupu refere. Nune’e PNTL bele halo kedan segimentu ba Ministériu Públiku kona-ba asaun hosi grupu sira ne’e”, nia husu.
Roberto Soares apela ba CNE no autoridade seguransa sira atu asume mós responsabilidade iha kampaña ikus Partidu CNRT nian ne’ebé sei realiza iha loron 18 maiu iha Dili, nune’e bele akompaña komísiu to’o remata.
“Lori Partidu CNRT nian naran ha’u husu mós ba militante, simpatizante no movimentu sira hotu ne’ebé fó apoiu ba CNRT atu iha kampaña ikus iha Dili ne’e tenke komporta tuir lei no orden atu labele halo reajen ruma hasoru provokasaun hosi parte ne’ebé de’it. Nafatin tau aas prinsípiu demokrasia nian no defeza ba Estadu diretu demokrátiku iha nasaun ne’e”, konklui.
Jornalista: Tomé Amado
Editora: Maria Auxiliadora
