DILI, 16 maiu 2023 (TATOLI)—Fórum Organizasaun Naun Governamentál Timor-Leste (FONGTIL) hamutuk ho nia organizasaun sira, tersa ne’e, halo lansamentu livru relatóriu auditóriu sosiál tinan 2022, ne’ebé foku ba setór saúde no edukasaun.
“Auditoria sosiál ba setór saúde ninian ita haree liu oinsá prestasaun servisu, jestaun fasilidade sira, enkuantu edukasaun haree ba merenda eskolár,” Diretór Ezekutivu FONGTIL, Valentim da Costa Pinto ‘Koko’, hateten iha salaun FONGTIL, Caicoli.
Durante membru sosiedade sivíl sira halo deskobrementu problema iha setór saúde iha terrenu, nota katak iha fasilidade saúde 75% estabelesidu ladún asesível ba maluk defisiénsia sira bainhira halo tratamentu saúde.
Aleinde ne’e, fasilidade saúde balun dook no labele asesu liña eletrisidade ne’ebé bele fasilita prosesu tratamentu saúde sira.
Notísia relevante : Governu apoiu FONGTIL halo sosializasun matadalan auditória sosiál 2021
Enkuantu, kona-ba edukasaun, membru sosiedade sivíl deskobre iha eskola balun iha munisípiu Covalima halo jestaun ba merenda eskolár ladún másimu, nune’e estudante sira han maibé la bosu nafatin tanba porsaun la sufisiente.
“Ami sei aprezenta deskobrimentu ne’e ba Governu no Parlamentu Nasionál hodi hato’o ba ministériu relevante sira, nune’e bele halo jestaun di’ak no hatan ba preokupasaun. Semana oin ami sei aprezenta ba Governu no entidade hotu atu tau iha konsidera nune’e jornada orsamentu ba 2024 bele konsidera,” Velentim dehan.
Iha fatin hanesan, Koordenadora Konsellu Diretivu Rede Nasional Auditória Sosiál (KD-RENAS), Maria Evelina Iman, hateten, rede ne’e serbisu hamutuk ho FONGTIL hodi halo advokasia ba situasaun sira iha rai-laran, liu-liu ba preokupasaun komún sira.
“Advokasia ne’ebé sosiedade sivíl sira halo ne’e hanesan asaun di’ak hodi fasilita ita-nia komunidade tau interese komún. Liuhosi programa advokasia ida bele ajuda membru Governu sira haree ba situasaun sira ne’ebé durante ne’e povu hasoru hanesan saúde no edukasaun, asesibilidade ba ema defisiénsia no saneamentu baziku bee-moos,” nia tenik.
Advokasia ne’ebé halo hahú hosi nível aldeia, suku, postu administrativu, munisípiu to’o nasionál.
“Espera Governu foun bele tau konsiderasaun ba dekobrimentu sira tanba atu dezenvolve nasaun presiza ita hotu nia servisu hamutuk,” nia otimista.
Diretór Ezekutivu Servisu Apoiu Sosiedade Sivíl no Auditória Sosiál iha Gabinete Primeiru Ministru (SASCAS-PM, sigla portugés), Edvin Soares Noronha, dehan, rezultadu auditoria ne’ebé FONGTIL ho nia rede sira halo bele dirije ba liña ministériu relevante atu haree dadus deskobrementu sira nune’e bele tau konsiderasaun.
“Servisu Apoiu Sosiedade Sivíl no Auditória Sosiál sei la taka dalan ba servisu auditoria sosiál, tanba ami sai hanesan intermediáriu sosiedade sivíl sira ba Governu, tanba Timor-Leste nasaun ne’ebé iha prosesu konstrusaun nia-laran presiza partisipasaun ema hotu hodi dezenvolve ita-nia rai ba oin,” nia tenik.
Jornalista : Arminda Fonseca
Editora : Julia Chatarina
