DILI, 16 maiu 2023 (TATOLI) – Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri, dehan kuandu povu fó fiar mak sei hadia kondisaun sira hodi profisionál saúde sir abele halo atendimentu saúde ne’ebé di’ak ba povu.
“Ita iha espesialista sira maibé ita la prepara kondisaun atu servisu di’ak liután, hanesan ekipamentu diagnóstiku, tanba ita Timor-Leste, saúde sei gratuitu maibé la iha kualidade mak sei la halo buat ida. Entaun ita iha ona médiku ita-nia ona, enfermeiru ita iha ona no parteira maibé la iha ekipamentu atu sira servisu besik liu ba povu, ho ida ne’e mak bainhira FRETILIN manan iha elisaun ida ne’e sei tau prioridade ba saúde tanba saúde mak importante iha povu nia moris”, nia dehan liuhosikomísiu iha Tasi tolu, ohin.
Nia rekoñese, espesialista barak iha Timor-Leste maibé Governu la iha preparasaun hodi kria kondisaun ba sira atu hala’o sira nia servisu hodi fó atendimentu ba povu.
“FRETILIN manan mak sei rezolve problema báziku sira iha rai ida ne’e tanba saúde sei falta jestaun no organizasaun tanba doutór de’it iha rai ida ne’e hamutuk 1300 resin. No espesialista timoroan barak ba bebeik maibé la iha kondisaun atu halo servisu sira ne’e”, nia akresenta.
Mari husu ba povu atu vota Fretilin iha 21 maiu hodi manan, atu hadia povu nia moris iha rai ida ne’e”, nia afirma.
Jornalista : Felicidade Ximenes
Editór : Zezito Silva
