iklan

HEADLINE, KAPITÁL

INDDICA, I.P sensibiliza lei direitu labarik ba mídia sira

INDDICA, I.P sensibiliza lei direitu labarik ba mídia sira

Labarik sira halimar iha Tasi-ibun Jardin B.J Habibie, Bidau Santa Ana. Imajen Tatoli/António Gonçalves

DILI, 16 maiu 2023 (TATOLI)—Institutu Nasionál Defeza Direitu ba Labarik, Institutu Públiku (INDDICA, sigla portugés) hamutuk ho Ministériu Asuntu Parlamentár no Komunikasaun Sosiál (MAPKOMS) no Sekretaria Estadu Komunikasaun Sosiál (SEKOMS) halo sensibilizasaun lei direitu labarik ba mídia sira.

Sekretária Ezekutiva INDDICA, I.P, Teresa Maria Freitas, hateten, objetivu atividade ne’e tanba haree katak mídia hanesan papél importante atu fó hatene ba entidade hotu bele fó protesaun no prevensaun ba labarik sira, liu-liu iha ámbitu partidu polítiku sira halo kampaña ba Eleisaun Parlamentár 2023.

“Ita hatene mídia nu’udar kanál ba informasaun no hanesan ita-nia ponte ba informasaun liga ho asuntu papél direitu ba labarik. Ho ida-ne’e hakarak konvida mídia sira fó-sai lei direitu labarik atu entidade hotu, liu-liu inan-aman sira asegura direitu labarik sira no fó protesaun atu  salva guarda direitu labarik sira-nia tanba labarik barak mak partisipa iha kampaña,” Sekretária Ezekutiva institutu hateten iha Caicoli, tersa ne’e.

Notísia relevante : Timor-Leste Garante Direitu Labarik

INDDICA, I.P hanesan institutu públiku ne’ebé maka bazeia ba dekretu-lei númeru 4/2021 atu fó protesaun no salva guarda labarik sira, enkuantu liga ba mídia nia papél hanesan INDDICA, I.P nia autór hodi bele divulga informasaun ba ema hotu bele asesu ho klaru hodi fó protesaun adekuadu ba labarik sira.

“Ami halo ona koordensaun ho Komisaun Nasionál Eleisaun (CNE, sigla portugés), Servisu Tékniku Administrativu Eleitorál (STAE), Polísia Nasional Timor-Leste  (PNTL), Autoridade hotu inklui partidu polítiku sira atu fó hatene durante tempu kampaña labele lori labarik sira partisipa, maibé presiza fó protesaun no tuir regulamentu sira,” nia dehan.

Nune’e, institutu husu parte hotu ninia kontribuisaun ba asuntu direitu labarik tanba durante atividade kampaña nota katak labarik sira tuir kampaña no partidu polítiku sira kuaze lori atributu partidu hodi fó labarik sira uza.

“Ami sempre koopera ho Polísia no Autoridade sira ne’ebé iha terrenu atu fó protesaun ba labarik sira, atu sira uza sira-nia tempu barak ba halimar no eskola, labele tuir kampaña,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!