DILI,16 maiu 2023 (TATOLI) – Institutu Nasionál Kombate HIV-SIDA halo sensibilizasaun no habelar informasaun HIV-SIDA ba estudante sira iha SOLS Becora hodi bele prevene sedu ba moras refere.
“Ojetivu husi sensibilizasaun ida ne’e atu habelar informasaun HIV-SIDA ba estudante SOLS tanba iha ne’e grupu oinoin mak hamutuk, entaun atu hasa’e sira-nia koñesimentu, hodi sira bele hasees aan husi transmisaun Virus HIV-SIDA ba iha família no kolega sira”, Prezidente Institutu Nasionál Kombate HIV-Sida Atanasio de Jesus, informa ba jornalista sira iha Sols Becora, ohin.
Nia hateten, númeru HIV-SIDA ne’ebé deteta barak tanba esforsu husi Institutu Nasionál Kombate HIV-SIDA no Ministériu Saúde ne’ebé halao nafatin atividade sensibilizasaun ba populsaun sira.
“Bainhira ita la halo sensibilizasaun no detesaun entaun númeru ne’e tun, tanba ita-nia esforsu makas mak kazu ne’e sa’e, bainhira la halo detensaun, kazu ne’e mantein, entaun daudaun ne’e servisu makas ho parseiru sira deteta kazu barak”, nia informa.
Nia hatutan, kazu infesaun ba HIV-SIDA agora dadaun iha ne’e hamutuk 1.830, husi númeru ne’e maioria hetan ona sintomas HIV-SIDA, deteta kazu makas ne’e bainhira ba halo tratamentu iha hospitál. Entaun husi ne’e iha ema na’in 279 mak lakon vida no sira ne’ebé mak lakon tratamentu hamutuk 354.
Iha fatin hanesan, profesora SOLS Becora, Suzana Ribeiro Gracia, agradese tebes ba Institutu Nasionál Kombate HIV-sida ne’ebé mak fahe informasan kona-ba HIV-Sida nian.
“Ami atu hetan informasaun sira kona-ba HIV-SIDA nian ne’e ami kontente tebes, ne’ebé liu husi informasaun sira hanesan ne’e mak hodi ajuda ami nia estudante sira iha ne’e, atu hadook sira nia aan husi moras HIV-sida nian”, Suzana Ribeiro Gracia konklui.
Estudante SOLS Becora ne’ebé partisipa iha sensibilizasaun informasaun husi Instituto Nasionál Kombate HIV-SIDA ida ne’e hamutuk 200-resin.
Jornalista : Felicidade Ximenes
Editór : Zezito Silva
