KFP partisipa “Senior Official Meeting 22nd on ASEAN CCSM” iha Brunei
DILI, 16 maiu 2023 (TATOLI)—Komisaun Funsaun Públika (CFP, siglá portugés) partisipa iha the preparatory meeting and senior official meeting for the 22nd on ASEAN Corporation in Civil Service Matter’s (ACCSM), ne’ebé hala’o iha Brunei Darussalam durante loron rua (09-10 maiu 2023).
Tuir komunikadu imprensa ne’ebé Agência TATOLI asesu, tersa ne’e, haktuir objetivu jerál hosi enkontru ne’e mak halo median evaluation ba implementasaun ACCSM ninia Work Plan (2021-2025), tuir ho halo diskusaun hodi hetan konsensu ba Work Plan Post 2025, no oinsá atu promove papél serbisu públiku ba kontribuisaun ba dezenvolvimentu pilár tolu importante iha komunidade ASEAN nian iha polítika seguransa, ekonómika no sosiu kulturál nian.
KFP ninia partisipasaun, bazeia ba guidelines kona-ba estatutu nu’udar observadór, atu akompaña, entende no inteira ho diskusaun sira kona-ba dezenvolvimentu estrutura estratéjika sira hodi fornese kolaborasaun di’ak entre nasaun ASEAN nian ba esperiénsia di’ak sira hodi delibera no apresia ba rekomendasaun sira ne’ebé mak partilla ba malu iha forum reuniaun ASEAN nian durante iha Brunei.
Iha aprezentasaun median evaluation ba progresu implementasaun work plan 2021-2025, nasaun membru ida-idak hato’o individualmente ninia progresu implementasaun sira, saida mak hala’o ona no saida mak seida’uk, hamutuk ho dezáfiu sira, ne’e depois tuir ho relatóriu hosi Sekretariadu ASEAN, ne’ebé lidera hosi Indonézia, kona-ba implementasaun planu serbisu ACCSM períodu 2021-2025 nian, ne’ebé mais abranjente.
Iha ne’e, sekretariadu ASEAN relata kona-ba programa sira mak implementa tiha ona no sira-ne’ebé mak seidauk implementa.
Kona-ba sesaun diskusaun ba planu serbisu post 2025, ne’e hato’o uluk brevemente hosi Brunei Darussalam, nu’udar nasaun atualmente lidera hela ACCSM ba períodu tinan rua.
Hafoin realiza tiha aprezentasaun sira, sesaun tuir mai kontinua kedas rona feedback sira hosi nasaun membru no ikus mai kompleta ho konsensu entre nasaun membru sira ba planu serbisu ACCSM periodu post 2025.
Iha sesaun diskusaun ba loron daruak nian, Prezidente meza ASEAN nian fó mós oportunidade ba Prezidente KFP, Faustino Cardoso Gomes, hodi halo intervensaun, hodi naran Funsaun Publika Timor-Leste agradese ba konvite, hodi destaka katak partisipasaun ida-ne’e sai hanesan esperiénsia dahuluk Komisaun Funsaun Publika nian nu’udar orsevadór iha reuniaun ACCSM.
“Iha oportunidade ida-ne’e, Timor-Leste aprende no oinsá atu familiariza ho funsionamentu iha ACCSM ne’ebé la’o iha reuniaun sira, ba implementasaun planu serbisu, hodi enrikese no valorizasaun ba esperiensia ASEAN member states civil service nian, prátika di’ak sira iha serbisu atendimentu públiku, estratejia rekursu umanu, inovasaun ba investimentu futuru ida di’ak no buka hatene importansia sira hodi partilla no kolaborasaun sira,” nia hateten liuhosi nota.
Nune’e, Timor-Leste hanesan nasaun joven ida ho forsa traballu iha Funsaun Públika hamutuk 36,941, ne’ebé hatúr ninia prinsípiu sira iha ASEAN kona-ba prestasaun serbisu públiku ba asesibilidade, partisipasaun, responsabilidade, laiha diskriminasaun no inkluzaun no kapasidade.
Daudaun ne’e, funsaun públika Timor-Leste iha idade média mane 47, ba 43 ba feto, tendo em conta ho seguransa sosiál nian estabelese idade 60 ba reforma, nune’e funsaun públika timorense iha maiór parte faze intermedia ba sira-nia kareira.
Prezidente KFP mós destaka liután kona-ba preparasaun administrasaun públika Timor-Leste nian hodi antisipa realizasaun ninia full membership ASEAN, katak esforsu hamutuk iha administrasaun públika timorense nian hodi garante ninia rekursu sira-ne’ebé preparadu no motivadu atu hasa’e sira-nia kapasidade, esperiénsia hodi serbisu hamutuk ba kolaborasaun sira ativamente hodi alkansa ninia objetivu ba kooperasaun ASEAN ninian kona-ba funsaun públika.
Partisipasaun iha the preparatory meeting and ACCSM senior official meeting for the 22nd ne’e mai hosi Estadu membru hanesan, Malázia, Indonézia, Myanmar, Laos PDR, Brunei Darrussalam, Vietnam, Singapura, Filipina, Kambodia no Tailándia.
Delegasaun Timor-Leste, ne’ebé reprezenta hosi Komisaun Funsaun Públika, hatán ba konvite hosi Sekretariu Permanente Civil Service Governance, Ajman Bin Haji Meludin hosi Brunei Darrussalam diretamente konvida Prezidente Komisaun Funsaun Públika, ne’ebé akompaña hosi Sekretária Ezekutiva no pontu fokal ASEAN Sosiu-Kultural nian iha Komisaun Funsaun Públika Timor-Leste, hodi partisipa iha sesaun aprezentasaun no diskusaun sira ba Civil Service Matter’s hosi nasaun membru sira.
Jornalista : Nelson de Sousa
Editór : Cancio Ximenes
