MANATUT0, 16 maiu 2023 (TATOLI)—Administradór postu administrativu Laclubar, munisípiu Manatuto, Francisco Soares, hateten komunidade Laclubar ptreokupa ba estrada hosi kruzamentu Laclubar to’o iha Laclubar Vila ne’e aat tebes.
“Ida-ne’e mak sai preokupasaun ba ami mak hanesan estrada hosi kruzamentu Natarbora to’o iha Vila Laclubar nian mak aat loos no presiza atu hadi’a, nune’e komunidade bele asesu,” nia hateten ba Agência Tatoli liuhosi telefónika, tersa ne’e.
Nia parte halo ona pedidu ba Inspesaun Jerál Estadu (IGE), hodi hadi’a tiha maibé to’o agora seidauk iha resposta hosi IJE ne’e rasik.
“Kona-ba kestaun ne’e ha’u halo pedidu ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) maibé seidauk iha resposta, tanba ita atu tama ba eleisaun, movimentasaun kareta nian ne’ebé tula material sensitivu no naun sensitivu sira la’o ho di’ak no susesu tuir orientasaun hosi leten sira-nian,” nia hateten.
Nia hatutan estrada refere ne’e kuaze kotu maibé ekipa hosi Laclubar hateru ona rai maibé presiza Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) nia tulun.
“Durante ne’e ita haree kuak sira, ita orienta ita-nia funsionáriu sira tanba ami haree pontu ida-ne’ebé kategória risku liu mak antes atu tama ba Laclubar Vila mak kuaze atu kotu. To’o momentu ida atu kotu, ami ba taka ho rai ona maibé atu di’akliu ne’e mak ami halo pedidu IGEADE, I.P nune’e bele hadi’a hodi ita bele asesu,” nia dehan.
Tanba, tuir nia, eleisaun parlamentár 2023 no hela loron de’it ona, nune’e IGEADE, I.P bele ajuda nune’e bainhira tempu udan labele prejudika movimentasaun komunidade nian no transportasaun materiál eleisaun nian.
“Iha tempu importante hanesan ita-nia órgaun eleitorál sira atu transposta material no tempu atu eleisaun mak udan, ne’e sai kestaun ida ba ita, nune’e ha’u nu’udar Administradór Postu Laclubar nian, iha hanoin no halo pedidu ba IGEADE, I.P,” nia dehan.
Jornalista : Osória Marques
Editór : Cancio Ximenes
