DILI, 16 maiu 2023 (TATOLI) – Ministériu Administrasaun Estatál (MAE) prepara ona karreta 50 atu transporta eleitór sira bá ida-idak ninia munisípiu hodi partisipa iha eleisaun parlamentár 2023.
“Ita rejista ona karreta hamutuk 50 maka prontu atu transporta ita-nia eleitór sira ba ida-idak ninia munisípiu, maibé ne’e provizória hela tanba sei iha tan viatura lubuk ida maka sei oferese hosi ajénsia no kompañia balun”, Xefe Gabinete interinu MAE, Libert Soares, dehan ba Tatoli via telefone, tersa ne’e.
Nia haktuir katak planu ida ne’e Governu halo atu ajuda eleitór sira ne’ebé hela iha Dili bele bá ejerse sira-nia direitu nu’udar sidadaun hodi partisipa iha festa demokrasia iha tinan ne’e.
Tuir Libert Soares, veíkulu ne’ebé MAE sei oferese ba eleitór sira ne’e dala ida de’it, signifika tula votante sira bá no bainhira fila mai sira rasik maka sei buka transporte.
Transporta sira ne’e sei tula eleitór bá munisípiu 11 de’it, tanba Ataúro no Oé-Cusse la tama iha planu refere.
“Ita fahe ona oráriu atu transporta eleitór ka votante sira ba munisipiu ne’e ba grupu tolu. Dezlokasaun sei hahú hosi loron rua, entre 18 no 19”, katak.
Votante sira husi munisípiu Lautém, Baucau, Viqueque no Manatuto sei konsentra iha Sentru Konvensaun Dili (CCD), husi Aileu, Ainaro, Manufahi no Covalima konsentra iha BOP, Caicoli nia oin no husi Ermera, Bobonaro no Liquiçá iha uma altar, Tasi Tolu.
Jornalista: Tomé Amado
Editora: Maria Auxiliadora
