VIQUEQUE, 16 maiu 2023 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) sukursál Viqueque rekolla taxa $640 durante marsu 2023.
“Ita rekolla taxa hosi empreza sira-ne’ebé mai halo rejistu atividade negósiu iha munisípiu Viqueque. Ami seidauk hatama envolvementu taxa abríl, fulan ida-ne’e hamata tiha maka fó sai ba públiku,” Koordenadora SERVE, I.P, Cesaltina da Conceição Soares, informa, iha ninia knaar fatin, Beloi Viqueque, tersa ne’e.
Dadus hosi marsu rejistu empreza unipsoal LDA foun iha neen no rejistu enin ba negósiu kiik iha sia, nune’e totál hamutuk 15, renovasaun tinan liu empreza unipesoál LDA hamutuk haat no enin hamutuk 15, alterasaun ba atividade negósiu enin hamutuk rua, unipesoál hitu no LDA ida, nune’e totál hamutuk 10.
“Ami haree negosiante sira iha munisípiu Viqueque hahú kompreende ona kona-ba prosesu rejistu. Balun maka seidauk kompreende entaun sira mai, ami esplika depois sira kompleta dokumentu maka mai rejista,” nia akresenta.
Notísia relevante : Durante 2021, SERVE Viqueque rejista empreza 285
Nia relata, durante kampaña ba Eleisaun Parlamentár 2023, Servisu Rejistrasaun kontinua simu rejistu atividade negósiu.
“Maski kampaña la’o, maibé ita-nia negosiante sira kontinua halo rejista atividade negósiu no balun mai halo renovasaun. Ida-ne’e hatudu katak ita-nia negosiante sira tau prioridade ba atividade negósiu sira,” nia tenik.
Koordenadora dehan, servisu atendimentu la’o di’ak maibé difikuldade ne’ebé enfrenta maka fatin.
“Antes ne’e husu ona ba Autoridade munisípiu hodi oferese fatin maibé to’o agora seidauk ofese fatin ruma,” nia lamenta.
Servisu atendimentu rejistu ka renovasaun hahú tuku 08:30 to’o tuku 17:30 lorokraik, enkuantu funsionáriu SERVE, I.P Viqueque hamutuk na’in-12 mak halo atendimentu.
Jornalista : Vitorino Lopes da Costa
Editora : Julia Chatarina
