BAUCAU, 16 maiu 2023 (TATOLI) – Sekretariadu Tékniku Administrasaun Eleitorál (STAE) Munisípiu Baucau finaliza ona prosesu pakotementu materiál sensitivu no la’ós-sensitivu.
Diretór STAE munisípiu Baucau, Natividade Freitas Guterres, esplika, hafoin transporta hosi nasionál prosesu pakotementu materiál la’ós-sensitivu hahú iha loron-13 no kontinua kedas materiál sensitivu iha loron-14 no finaliza iha loron segunda, 15 maiu.
“Durante pakotementu liuhosi prosesu verifikasaun ami la identifika boletín votu ruma aat,” Diretór STAE Baucau hateten iha Vila Nova, sesta ne’e.
Natividade Guterres argumenta, materiál sensitivu hanesan livru boletín votu hamutuk ba kada sentru votasaun iha aumentu pursentu 10 hosi livru 2.208 ka boletín votu hamutuk 110.400.
Materiál hirak-ne’e agora daudaun asegura iha salaun apuramentu no hetan seguransa másimu hosi membru Polísia Nasionál Timor-Leste (PNTL) munisípiu Baucau hodi hein halo distribuisaun ba sentru votasaun hamutuk 150 iha postu admistrativu neen.
STAE Baucau identifika ona transporte marka governu iha Autoridade Munisipál hamutuk 35, hosi nasionál 10 inklui aluger hamutuk 25 atu transporta materiál eleisaun ba kada sentru votasaun.
“Iha sentru votasaun balun hanesan iha postu Baucau Vila iha suku Gariuai, aldeia Uatuwa, postu Laga no Baguia, ita prepara karregadór atu ajuda tanba kondisaun estrada no hakat mota,” Natividade Guterres akresenta.
Tuir planu prosesu pakotementu materiál la’ós-sensitivu hala’o durante semana-ida maibé STAE Baucau konsege finaliza ho durasaun loron-tolu nune’e kontinua identifika transporte hodi halo distribuisaun ba kada sentru votasaun.
Totál materiál sensitivu no la’ós-sensitivu ne’ebé distribui hosi nasionál hamutuk hotu item 49, komposta hosi materiál sensitivu livru boletín votu hamutuk 2.208 ka buletin votu hamutuk 110.400, kabina votu 550, selus 5.400, akta operasaun 1.800, livru votante 1.800 no karimbu hamutuk 3800.
STAE Baucau rejista sentru votasaun hamutuk sentru votasaun 150 no estasaun votu 180 hosi tótal brigada na’in-150 no ofisiál eleitorál 1.800 hosi tótal eleitrór 99.158.
Jornalista : Natalino Belo
Editór : Evaristo Soares Martins
