DILI, 16 maiu 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE rejista observadór internasionál lubun atu akompaña prosesu votasaun no kontajen votu iha eleisaun parlamentár 2023.
Notísia Relevante: STAE apela eleitór sira partisipa eleisaun parlamentár iha 21 maiu
Nia hateten, observadór sira-ne’e mai hosi organizasaun internasionál hanesan Uniaun Europeia, ASEAN, CPLP, g7+ no nasaun Austrália ho nasaun sira seluk ne’ebé nia Embaixada iha Timor-Leste no universitáriu hosi nasaun balun.
“Ne’ebé, akreditasaun STAE fó hotu ona. Balun iha ona ita-nia rai dezde semana kotuk no balun aban ka bainrua to’o iha Timor-Leste. Sira-ne’e kategória observadór sei hela ne’e to’o rezultadu eleisaun sa. Ne’ebé, sira sei akompaña de’it ita-nia prosesu votasaun ho kontajen,” nia hateten ba jornalista sira iha nia kna’ar fatin Caicoli, tersa ne’e.
Observadór sira-ne’e mai observa aspeitu sira hotu-hotu kona-ba lei eleitorál sira, seguransa, haree eleitór sira eskolla ho live ka lae, haree preparasaun tékniku másimu ka lae, haree TL kumpre prosedimentu ne’ebé regulariza kona-ba prosesu eleitorál sira, haree prosesu eleitorál hetan mós kobertura hosi mídia ho asuntu sira seluk.
“Sira mai observa, maibé sira la interven iha prosesu sira tomak,” nia dehan.
Hafoin ne’e. nia dehan, sira sei halo relatóriu ho rekomendasaun ba iha Estadu no órgaun eleitorál atu konsidera bele haree iha futuru mellora liután prosesu sira.
STAE mós rejista observadór nasionál hosi Provedoria Direitu Humanu no Justisa (PDHJ), Fundasaun Mahein, Observatóriu Igreja ba Asuntu Sosiál (OIPAS), Yayasan HAK, Konsellu Nasionál Juventude Timor-Leste (CNJTL) no sira seluk tán.
Notísia Relevante: Kampaña eleitorál ba Eleisaun Parlamentár sei hahú iha 19 abríl
Jornalista : Nelson de Sousa
Editór : Cancio Ximenes
