Autoridade Baucau hahú prepara selebra loron restaurasaun independénsia
BAUCAU, 17 maiu 2023 (TATOLI) – Autoridade Administrasaun Munisipál Baucau hahú halo preparasaun hodi selebra loron restaurasaun independénsia Timor-Leste ba dala-21.
Prezidente Komisaun Organizadora atuál Diretór Serbisu Munisipál Saúde Baucau, Domingos Reinaldo da Costa Guterres, esplika, tema importante ba selebarasaun loron importante refere mak “Hametin Demokrasia hodi hadi’a povu-nia Moris”.
“Tinan-ne’e diferente tanba loron tuir mai eleisaun tanba ne’e ita prepara iha loron-19 misa no hasa’e bandeira iha loron sábadu, 20 maiu,” Prezidente Komisaun Organizadora informa ba Agência TATOLI iha Vila Antiga, kuarta ne’e.
Sekuénsia programa misa sei realiza iha Igreja Katedrál, Vila Antiga, Baucau, loron-sesta, tuku 09:00 to’o remata no hasa’e bandeira sei realiza sedu tanba presiza distribuisaun materiál eleisaun ba sentru votasaun ne’ebé realiza iha administrasaun munisipál Baucau.
Komisaun Organizadora mós prepara korpu hasa’e bandeira hamutuk na’in-hitu komposta hosi seguransa na’in-tolu no estudante na’in-haat tanba maioria membru Polísia Nasionál Timor-Leste tenke destaka ba sentru votasaun iha munisípiu Baucau.
“Inspetór serimónia sei dirije hosi Prezidenti Autoridade Munisipál tanba konfirmadu ona governante sira sei la partisipa,” Domingos Guterres akresenta.
Diretór saúde ne’e husu ba komunidade iha área munisípiu Baucau atu hasa’e bandeira nasionál iha uma, bairru inklui halo limpeza jerál nu’udar sinál nasionalismu hodi selebra loron istóriku refere.
Komisaun Organizadora sei utiliza totál orsamentu ba eventu selebarasaun loron restaurasaun independénsia iha munisípiu Baucau hamutuk $ 6.500 ne’ebé akumula hamutuk autoridade suku 56, Administradór Postu administrativu neen, kargu diretór serbisu munisipál inklui komunidade hotu.
Jornalista : Natalino Belo
Editór : Evaristo Soares Martins
