CNE Covalima identifika partidu neen la kumpre oráriu kampaña eleitorál

COVALIMA, 17 maiu 2023 (TATOLI)—Komisaun Nasionál Eleisaun (CNE-sigla portugés) Covalima, identifika partidu neen (6) la kumpre oráriu kampaña eleitorál hodi hala’o sira-nia atividade kampaña iha munisípiu Covalima.

Diretór Komisaun Nasionál Eleisaun (CNE-sigla portugés) Covalima, Hermenegildo de Sena, hateten partidu polítiku neen ne’ebé la hala’o atividade kampaña eleitorál iha Covalima mak partidu Asociacão Populár Mornarquia Timorense (APMT), Partidu Unidade Nasionál Demokratika da Registencia Timorense (UNDERTIM), Partidu Liberta Povu Aileba (PLPA), Partidu Socialista de Timor (PST), Partidu Movimentu Livertasaun Povu Maubere (MLPM)no Partidu Repúblikanu (PR).

“Partidu polítiku sira hahú hala’o atividade kampaña eleitorál iha loron 19 fulan-abril to’o loron 18 fulan-maiu tinan 2023, maibé durante ne’e partidu ne’ebé mak la hala’o sira-nia atividade kampaña eleitorál mak partidu APMT, UNDERTIM, PLPA, PST, MLPM no PR, ita identifika la hala’o atividade kampaña iha Covalima,” Hermenezildo de Sena hato’o ba Agência Tatoli, iha nia servisu fatin Kampung Baru, kuarta ne’e.

Partidu hirak ne’e la hala’o atividade kampaña eleitorál iha munisípiu Covalima, tanba partidu neen refere lahala’o atividade kampaña eleitorál ho tipu sira hanesan komísiu, diálogu, mini kampaña mós sira nunka realiza.

Tanba, nia dehan, antes ne’e partidu polítiku sira atu hala’o atividade kampaña ne’e Komisaun Nasionál Eleisaun (CNE-sigla portugés) sempre hetan númeru kontaktu hosi koordenadór no ekipa susesu partidu polítiku sira.

“Partidu polítiku sira atu hala’o sira-nia atividade iha Covalima, ita hetan ona númeru kontaktu hosi koordenadór ka ekipa susesu munisípiu, ita tenta kontaktu dala ruma númeru la ativa no dala ruma mós la atende, nune’e prejudika CNE atu halo monitorizasaun,” nia dehan.

Aleinde ne’e, CNE relata partidu polítiku ne’ebé la hala’o atividade iha Covalima, nia mós relata partidu sira seluk hala’o sira-nia kampañia iha Covalima sempre iha koordenasaun di’ak ho parte Komisaun Nasionál Eleisaun hodi observa sira-nia atividade kampaña eleitorál.

“Durante ne’e, partidu ne’ebé hala’o atividade kampaña eleitorál ami kolabora di’ak tebes tanba sempre fó koñesimentu ba CNE, atu hala’o atividade ruma no CNE sempre hola parte iha sira-nia atividade kampaña,” nia hateten.

Entretantu, iha 13 fevereiru 2023, Prezidente Repúblika José Manuel Ramos Horta dekreta ona loron eleisaun parlamentár ne’ebé sei realiza iha 21 maiu 2023.

Jornalista : Celestina Teles

Editór       : Cancio Ximenes