Dadus provizóriu: kliente EDTL, E.P 2.060 simu ona pulsa eletrisidade $5
DILI, 17 maiu 2023 (TATOLI)—Kliente Eletricidade de Timor-Leste, Empreza Públika (EDTL, E.P) hamutuk 2.060 iha territóriu laran simu ona pulsa eletrisidade $5.
Komisáriu Ezekutivu Servisu Tékniku no Vogal Konsellu Administrasaun EDTL, E.P, Latino Jerónimo, informa, inisiativa atribui pulsa ba kliente tanba EDTL, E.P enfrenta difikuldade sistema ne’ebé halo fallansu prosesu tranzasaun pulsa eletrisidade.
“Ita seidauk iha relatóriu ikus maibé dadus provizóriu ne’ebé operadór telekomunikasaun hanesan Telemor, Timor Telecom no Telkomcel oferese, iha kliente hamutuk 2.060 mak asesu ona maibé karik balun seidauk hetan, ami kontinua fó nafatin,” Komisáriu hateten liuhosi programa entrevista eskluziva iha estúdiu Agência Tatoli, Farol, kuarta ne’e.
Notísia relevante : EDTL,E.P : Sistema sosa pulsa elétrika lentu tanba instabilidade rede internet
Nia dehan, hafoin EDTL,E.P fó subsídiu pulsa eletrisidade ba kliente sira, ekipa téknika kontinua halo servisu normalizasaun ba sentru venda, nune’e daudaun tranzasaun la’o normál ona.
Sentru venda sira ne’ebé daudaun estabelese iha territóriu laran hamutuk 481.
“Husu ba kliente sira bainhira presiza atu sosa pulsa eletrisidade labele preokupa ona tanba sentru venda sira daudaun halo atividade normál ona,” nia apela.
Jornalista : Arminda Fonseca
Editora : Julia Chatarina
