FRETILIN sei hamoos korrupsaun bainhira lidera governasaun
BAUCAU, 17 maiu 2023 (TATOLI) – Partidu Frente Revolusionária Timor-Leste Independente (FRETILIN) bainhira manán iha eleisaun parlamentár hodi ukun iha governasaun sei hamoos korupsaun no kria kultura ne’ebé saudável.
Sekretáriu Jerál FRETILIN, Mari Alkatiri, esplika, bainhira FRETILIN hamutuk ho partidu aliadu rua seluk hanesan Partidu Libertasaun Popular, Khanek Haburas Unidade Nacional Timor Oan (KHUNTO) ukun iha governasaun sei hadi’a uluk estadu hanesan órgaun soberania haat, hamoos korupsaun, hadi’a jestaun katak programa governu ho kualidade, kria kultura no vida institusaun ne’ebé saudável no hametin estadu hodi loke dalan ba harii nasaun.
“Ita tenke iha governu ida diferente, labele todan demais atu labele gasta osan naran-naran,” Sekretáriu Jerál FRETILIN hateten iha kampu Darsula, suku Gariuai, kuarta ne’e.
Eis primeiru-ministru ne’e, argumenta, partidu tolu PLP, KHUNTO no FRETILIN iha eleisaun parlamentár sei la’o ketak-ketak maibe bainhira eleisaun remAta sei junta forsa hamutuk atu lidera governasaun foun liuhosi akordu plataforma entendimentu ne’ebé antes ne’e asinadu ona.
Nune’e mós presiza hadi’a mak edukasaun hanesan kompleta infraestrura, rekursu umanu no setór saúde, desportu hodi hasa’e juventude nia talenta, setór turismu ne’ebé konsidera setór hotu iha interligadu ba malu liuliu garante moris di’ak ba povu nia oan.
“Ita tenke iha governu ida ho setór hotu-hotu sai programa integradu ba dezenvolvimentu,” Mari Alkatiri akresenta.
Jornalista : Natalino Belo
Editór : Evaristo Saores Martins
