DILI, 17 maiu 2023 (TATOLI)—Governu liuhosi reuniaun Konsellu Ministru (KM) aprova projetu dekretu Governu, ne’ebé aprezenta hosi Ministru Ensinu Superiór, Siénsia no Kultura, Longuinhos dos Santos, ba alterasaun daruak dekretu Governu númeru 2/2015, loron 14 janeiru, ne’ebé aprova subsídiu akadémiku, bónus ba xefia no komplementu estraordináriu ba dosente Universidade Nasionál Timor-Lorosa’e (UNTL).
Projetu dekretu Governu ne’e aprezenta hosi Ministru Ensinu Superiór, Siénsia no Kultura, Longuinhos dos Santos.
“Alterasaun ne’e ninia objetivu atu armoniza konteúdu hosi diploma ida-ne’e ho rejime ne’ebé prevee ona, tuir lei iha dekretu-lei númeru 7/2012, loron 15 fevereiru, hafoin ninia alterasaun datoluk, no foun liu, ne’ebé mosu bainhira dekretu-lei númeru 62/2022, loron 31 agostu tama iha vigór,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante : UNTL la realiza orientasaun, estudante foun 1.000-resin kontinua rejista
Dekretu-lei ne’e introdús ona alterasaun ruma ne’ebé relasiona ho ingresu, promosaun no progresaun iha karreira dosente universitária, liuliu ho kriasaun nível foun sira.
Jornalista : Antónia Gusmão
Editora : Julia Chatarina
