DILI, 18 maiu 2023 (TATOLI) – Diretór Ezekutivu Klíniku Bairo Pite, Inacio do Santos, dehan iha fulan abríl, Klíniku Bairo Pite rejista moras Infesaun Vias Respiratóriu Aguda (ISPA) hamutuk 532.
“Iha fulan abríl ita iha ne’e rejista moras Infesaun Vias Respiratoriu Aguda (ISPA) hamutuk 532, husi númeru ne’e afeta ba labarik no mós ema boot sira”, Inacio do Santos dehan ba jornalista sira, ohin.
Nia hateten, moras ne’e afeta tanba haree ba rai udan depois bailoron, rai rahun suar no fó impaktu ba labarik no ema boot atu hetan moras ida ne’e.
“Bainhira sira mai halo tratamentu, ami-nia médiku sira fó tratamentu to’o sira rekopera hotu fila ba uma”, nia subliña.
Nia revela, atu halo prevensaun ba moras ne’e mak sai ba fatin ida tenke uza maskara no inan aman sira tenke kontrola labarik sira labele halimar iha rai rahun laran atu sira labele hetan moras ida ne’e.
Klíniku Bairo Pite mós rejista kazu diárea hamutuk 70-resin, moras kulit kuaze 140-resin, kazu asidente 27 no rejista mós kazu HIV-SIDA iha na’in ida.
Jornalista : Felicidade Ximenes
Editór : Zezito Silva
