MANATUTO, 18 maiu 2023 (TATOLI)—Administradór Postu Laclubar, munisípiu Manatuto, Francisco Soares, rekomenda ba Governu liuhosi MInistériu saúde atu hadi’a ambulánsia multifunsaun ne’ebé durante ne’e halo kobertura iha postu saúde Laclubar ne’ebé aat tiha ona.
“Ita iha ambulánsia multifunsaun ida, ne’ebé durante ne’e kobre iha Laclubar to’o agora labele halo servisu ka tula ema moras tanba kondisaun ladi’ak. Ho ida-ne’e ha’u sujere no rekomenda ba Ministériu Saúde atu haree kestaun ne’e,” Administradór Laclubar ne’e hateten ba Agência Tatoli liuhosi telefónika, kinta ne’e.
Nia dehan, ambulánsia multifunsaun ne’e atu kobre atividade saúde nian iha Laclubar ne’e presiza duni no iha nesesidade duni ba komunidade iha área rurál atu bele asesu ba fasilidade saúde.
“Tanba ambulánsia multifunsau ne’e bele kobre atividade hotu-hotu liga ho saúde nian, nia bele tula ema moras, bele ba atividade SISCA nian hosi suku ida ba suku seluk, no fahe ai-moruk,” nia dehan.
Aleinde ne’e, nia dehan, komunidade Fatumakerek mós kestiona tebes no preokupa liu ba sira-nia saúde tanba durante ne’e pesoál saúde iha sentru saúde Fatumakerek laiha.
“Ita hakarak hateten katak ita-nia sentru saúde iha suku Fatumakerek seidauk iha pesoál saúde no ida-ne’e ami husu parte relevante tenke koloka pesoál saúde nune’e bele atende ita-nia família ne’ebé presiza hanesan moras. To’o agora, seidauk iha mak ita-nia komunidade sempre kestiona no preokupa tebes bainhira ami realiza enkontru sira sempre alerta ba ami. Nune’e, ami kontinua esforsu hodi servisu hamutuk ho parte saúde nian, nune’e bele koloka pesoál saúde hodi bele atende pasiente sira,” nia hateten.
Ho asuntu ne’e, tuir nia, hosi parte saúde liu-liu pesoál saúde sira mak halo konsultasaun no vizita semana rua dala ida maibé Estrada mak labele to’o iha fatin refere, nune’e defisil mós ba pesoál saúde postu nian atu bá.
“Iha ami-nia postu ne’e iha médiku na’in tolu, mane rua no feto ida. No sira-ne’e halo atendimentu movél maibé depende ba tempu la’ós movél loro-loron,” nia hateten.
Diretór Saúde munisípiu Manatuto, Mateus Vicente Correia, hateten tanba iha médiku balun ne’ebé hakarak kontinua sira-nia estudu, entaun fatin mamuk maibé ida-ne’e Ministériu Saúde kontinua esforsu nune’e tempu badak bele prienxe.
“Ezemplu, iha balun kompleta no iha balun seidauk hanesan iha Fatumakerek ne’e ita iha de’it parteira ida ho enfremeiru ida,” nia hateten.
Maibé, nia dehan, sira labele ba ne’ebá hodi fó atendimentu ba pasiente sira tanba estrada mak la di’ak no seluk mak konstrusaun postu saúde ne’e rasik kompañia ne’ebé responsabiliza ne’e seidauk entrega.
Maibé, postu saúde Fatumakerek ne’e kontinua hein kompañia entrega uma no bainhira dalan di’ak ona mak parte saúde sei destaka pesoál saúde ba fatin ne’e no pesoál saúde ba fulan ida hodi konsulta ema moras sira.
Jornalista : Osória Marques
Editór : Cancio Ximenes
