Eleitór 344 sei vota iha HorEX Baucau
BAUCAU, 18 maiu 2023 (TATOLI) – Sekretariadu Tékniku Administrasaun Eleitorál (STAE) rejista eleitór internadu na’in-344 sei vota iha Ospitál Rejionál Eduardo Ximenes (HorEX,sigla portugés) Baucau.
Diretór STAE Munisípiu Baucau, Natividade Freitas Guterres, esplika, lista refere submete ba STAE iha loron 10 maiu komposta hosi pasiente no família hamutuk na’in-276 no profisionál saúde hamutuk na’in-68.
“Sira-ne’e mak sei tuir votu, enkuantu pasiente seluk ne’ebé halo tratamentu maibé naran laiha, ami sei la autoriza tanba tuir lei,” Diretór STAE Baucau hateten iha Vila Nova, kinta ne’e.
Desizaun refere bazea ba dekretu governu númeru 10/2020, artigu 1 kona-bá ámbitu aplikasaun katak bainhira lista naran eleitór (internadu) submete ba STAE loron-10 antes eleisaun.
Karta hosi STAE halo ona esplikasaun bazea ba dekretu governu no halo ona koordenasaun ho dirijente HorEX tanba ne’e bainhira mosu dezentendimentu iha ona baze legál kona-bá direitu votu internadu nian.
“Ami esplika ona bazea ba lista tanba ne’e pasiente ikus iha HorEX sei la vota,” Natividade Guterres akresenta.
HorEX Baucau parte hosi sentru votasaun Ensinu Baziku Sentral Tirilolo nune’e bainhira hahú eleisaun sei kontinua kedas ba estasaun votu iha ospitál atu eleitór internadu sira ezerse direitu.
STAE husu ba komunidade liuliu eleitór munisípiu Baucau atu partisipa másimu iha loron eleisaun lori ho kartaun eleitorál, Billete Identidade ka pasaporte tanba liuhosi votu mak determina nasaun nia futuru.
Jornalista : Natalino Belo
Editór : Evaristo Soares Martins
