COVALIMA, 18 maiu 2023 (TATOLI)—Governu liuhosi Sekretária Estadu Formasaun Profisionál no Empregu (SEFOPE), kinta-ne’e, asina kontratu ho grupu auto empregu hitu (7) hosi grupu auto empregu hamutuk 42 ne’ebé Governu estabelese iha Covalima.
“Governu asina kontratu ho Grupu auto-empregu hitu (7) hosi grupu auto empregu ne’ebé Governu estabelese hahú 2019 to’o 2023 hamutuk grupu auto empregu 42. Ita-hotu hatene programa hosi Sekretária Estadu Formasaun Profisionál no Empregu rasik ho programa auto empregu,” Sekretariu Estadu Formasaun Profisionál no Empregu (SEFOPE), Alarico do Rosário, hateten ba jornalista sira, iha salaun Mama Resto.
Governu fó apoiu grupu sira hala’o sira-nia atividade negósiu la hanesan, ne’ebé durante hala’o monitorizasun balun la’o di’ak no balun mós ladun la’o.tanba programa ida-ne’e durante ne’e implementa de’it iha nasionál.
Ho nune’e, VIII Governu KOnstitusionál lori programa ida-ne’e hakbesik mai iha munisipiu, nune’e autoridade sira mós bele halo monitorizasaun ba grupu ne’ebe hala’o sira-nia atividade la’o di’ak.
Grupu auto empregu ne’ebé asina kontratu ho Governu hala’o sira-nia atividade negósiu ho tipu ne’ebé la hanesan mak balun loke hanesan halai ba agrikultura, karpintaria, ofisina no seluk tan.
Sekretáriu Administradór munisípiu Covalima, Francisco de Jesus Alves, hato’o agradesimentu ba VIII Governu Konstitusionál liuhosi Sekretária Estadu Formasaun Profisionál no Empregu (SEFOPE) fó apoiu insentivu ba grupu auto empregu hodi dezenvolve ekonómia família no kria servisu ba ema seluk.
“Ha’u hato’o agradese ba Governu maibé ita-boot sira hetan apoiu hanesan nee tenke iha responsabilidade.’Ha’u konfia jere ho di’ak no responsabiliza ho apoiu uitoan bele sai barak liu, tanba grupu balun parseiru hosi Administrasaun Munisípiu Covalima (AMC) hodi hadi’a AC,” nia dehan.
Autoridade Covalima husu ba grupu auto empregu sira-ne’ebé Governu apoiu insentivu hodi hala’o negósiu tenke jere ho ho didi’ak, autoridade sempre fó apoiu no mós sei hala’o monitorizasaun.
“Ita boot sira mak sai parseiru, ha’u-nia mensajen tenke jere ho di’ak AMC sei kontrola grupu sira nee no ami prontú fó apoiu ba ita boot sira,” nia hateten.
Diretór Prevensaun Comissãi Antí Corrupção (CAC), Rosário Salsinha, apresia ba Sekretáriu Estadu SEPFOPE ne’ebé lori programa hakbesik mai munisípiu hodi fó apoiu ba grupu auto empregu iha Covalima.
” Ha’u apresia ba sekretáriu Estadu SEFOPE ho nia bontade lori programa mai too ita-boot sira-nia oin, CAC ho autoridade lubuk-ida ami sai sasin ba asinatura ida-ne’e, projetu sira hala’o daudaun apoiu subsídiu ba ita-boot sira, labele monu ba leet tenke dezenvolve ho didi’ak,” nia dehan.
Ho nune’e, nia mós husu ba grupu auto empregu katak hafoin asina atu labele hamonu Governu nia naran tenke uza ho osan ho didi’ak, tanba prosesu ida-ne’e nakloke entre SEFOPE ho CAC hodi halo avaliasaun lubuk ida mak foin na’in hira atu simu.
Entertantu, grupu ne’ebé Governu estabelese hahú iha tinan 2019-2023 iha munísipiu Covalima, hamutuk 42 ne’ebé hala’o atividade sira hanesan prodús batako, ofisina motor, peska, karpintária, haki’ak fahi, ofisina elektrónika, rental no soldadura.
Governu estabelese grupu 42 ho nia benefisiariu hamutuk 212 ne’ebé fó apoiu insentivu ho totál orsamentu hamutuk $35,1140.25.
Jornalista : Celestina Teles
Editór : Cancio Ximenes
