Governu inaugura projetu bee-moos iha suku Belekasak
COVALIMA, 18 maiu 2023 (TATOLI)—Governu liuhosi Ministériu Obra Públika akompaña husi autoridade Covalima, kinta ne’e, inaugura projetu bee-moos iha aldeia Busada’o no Du’ut, suku Belekasak, postu sdministrativu Maucatar, munísipiu Covalima.
“Ohin, ha’u atu ko’alia ba fatór sira hanesan ida mak ita inaugura hela projetu bee-moos ne’e. Ha’u hakfodak no kontante bainhira hamutuk ha’u rona hosi xefe suku aldeia Du’ut ho Busada’o ne’e foin asesu bee-moos, hahú hosi okupasaun portugés too mai Timor-Leste Ukun rasik An tinan 20-resin, komunidade foin mak asesu bee-moos,” Ministru Obra Públika, Abel da Silva Pires, hateten liuhosi nia diskursu iha serimónia inaugurasaun projetu bee-moos, iha suku Belekasak.
Ho nune’e, membru Governu ne’e dehan, bee-moos importante ba ema-nia moris tanba bainhira bee-moos laiha defisil, eletrisidade mate bele sunu lilin maibé bee-moos mak laiha ne’e tenke buka hodi kuru duni bee-moos.
Governu servisu hamutuk ho Cruz Vermelha Timor-Leste (CVTL) ne’ebé antes Ministru rasik hala’o inaugurasaun ona ba projetu bee-moos iha suku Holpilat, aldeia Lela no agora hala’o inaugurasaun iha suku Belekasak iha aldeia Busada’o no Du’ut.
Aldeia dada bee-moos iha Suku Belekasak no suku Holpilat, Governu mós servisu hamutuk ho Cruz Vermelha Timor-Leste (CVTL) sei dada bee-moos ba komunidade sira iha postu administrative Zumalai ne’ebé prosesu agora la’o hela.
Representante Administradár Munisipiu Covalima, Francisco Mendonça “Tatamero” hateten, komunidade aldeia Busada’o no Du’ut la asesu bee-moos hahú tempu okupasaun Indonézia no Ukun an tinan 20-resin foin mak asesu bee-moos.
“Ita-nia serimónia ida ho prezensa Ministru Obra Públika atu entrega projetu bee-moos ne’ebé finaliza ona no bee-moos tama ona iha aldeia, imi asesu ona bee-moos. Dezenvolvementu mak nune’e, la’ós bebeik tuir nesesidade no ezijénsia mai hosi povu,” nia dehan.
Autoridade Covalima ne’e dehan, Governu iha Planu Estratéjiku Dezenvolvimentu Nasionál no planu dezenvolmentu munisípal, nune’e bainhira atu hala’o dezenvolimentu iha pilár sira hanesan Kapitál Sosiál, infraestrutura, ekonómia no mós kapitál instituisaun.
Kapitál infraestrutura, nia dehan, hanesan eletrisidade, estrada no bee-moos sai hanesan nesesidade bázika ba komunidade loro-loron ema presiza bee-moos.
Vise prezidente CVTL munisípiu Covalima, Pedro Amarál, orgullu implementa projetu bee-moos tanba sevisu ho durasaun fulan rua de’it bele finaliza projetu bee-moos no entrega ona projetu bee-moos ba komunidade iha suku Belekasak, postu administrativu Maucatar, munísipiu Covalima.
“H’u orgullu boot ba projetu dada bee-moos, komunidade hala’o servisu durante fulan rua de’it projetu bee-moos finaliza tanba ajuda hosi Ministru Obra Públika, nune’e ita bele halo inaugurasaun,” nia dehan.
Projetu konstrusaun bee-moos ne’e, fundu apoiu hosi Minnistériu Obra Publika ne’ebé implementa hosi Cruz Vermelha Timor-Leste (CVTL), hahú halao servisu iha loron 07 fulan- marsu tinan 2023 no iha loron 18 fulan-maiu tinan 2023 halo inaugurasaun.
Projetu bee-moos ne’e komunidade aldeia Du’ut ho Busada’o mak asesu ho totál Xefe familia 157 ho nia populasaun hamutuk 8,118.
Jornalista : Celestina Teles
Editor : Cancio Ximenes
