DILI, 18 maiu 2023 (TATOLI)— Prezidente Partidu União Democrático Timorense (UDT), Francisco David Carlos, kompromete wainhira hetan konfiansa husi povu iha Eleisaun Parlamentar (ElPar) tinan 2023, sei hariii eskola Pre-eskolár iha kada suku sira iha Timor-Leste (TL).
“Sekarik maun alin sira fo konfiansa vota ba UDT, kolabora kaer governu ne’e, prioridade primeiru mak harii eskola Pre-eskolár ne’ebe besik iha ne’e. Tamba, labarik sira nia formasaun tenke hahu hosi kiik no tenki fo eskola ida besik iha fatin ne’e. Ida ne’e mak komprimisiu UDT nian no hakarak fo edukasaun ba oan sira,” Presidente Partidu UDT dehan iha iha mini kampaña UDT nian ne’ebe halao iha Aldeia Ailele Hun, suku Camea, Postu Administratifu Cristo Rei Dili, kuarta ne’e.
Nia hatutan tan, UDT iha program esensiál hamutuk 15, maibe iha tolu mak prioridade liu, hanesan edukasaun, infraestruktura no saude.
“Programa tolu ne’e ita kolia ba edukasaun tanba, iha nasaun ida riku laos tamba minarais deit, maibe rekursus humanu ho ema matenek. Tanba, nasaun barak ne’ebe nia rekursus naturais laiha, maibe, nia iha ninia ema matenek no halo nasaun sai desenvolve maka’as liu,” nia dehan.
Francisco akresenta tan katak, saude iha Timor-Leste sai diskriminasaun bo’ot ho ida ne’e UDT hakarak halakon diskriminasaun ne’e iha ita ninia rai.
“Ita hare ukun nain sira kuandu moras sempre lori ba Singapura, Malaysia ou Indonezia. Enkuantu maun alin inan feton sira seluk tenke hakat deit ba Hospital Nasional hodi simu aimoruk deit mos susar ona. Ho Ida ne’e, UDT hakarak halakon diskriminasaun hotu no tenki halo tratamentu iha Timor laran tomak hanesan ho ema hotu,” nia deklara.
Aleinde ne’e tuir UDT, infraestruktura iha tinan rua kotuk liu ba, UDT konsege monta ona be’e moos ba komunidade sira iha Bedois.
Ho ida ne’e, nia dehan sekarik povu fo fiar, UDT sei dada be’e ba iha foho leten hodi fornese ba populasaun tomak tanba UDT hakarak halo justisa ba povu hotu.
Jornalista : Mirandolina Barros Soares
Editor : Armandina Moniz
