MANATUTO, 18 maiu 2023 (TATOLI)—Administradór postu administrativu Laclubar, munisípiu Manatuto, Francisco Soares, hateten Laclubar asina ona kontratu ho kompañia lokál nune’e tempu badak sei halo kanalizasaun bee-moos.
“Kona-ba bee-moos ne’e postu administrativu Laclubar asina ona kontratu ho kompañia lokál hodi halo kanalizasaun bee-moos nian mai Laclubar vila nian. Obra ne’e seidauk hahú maibé asina ona kontratu, tempu badak bele realiza ona,” nia hateten ba Agência Tatoli, liuhosi telefónika, kinta ne’e.
Administradór Laclubar hateten, aleinde kompañia lokál halo kanalizasaun bee-moos no sei konstrui mós tanke bee-moos ba komunidade.
“Ita bele dehan komunidade asesu bee-moos ne’e 75% ona, hosi populasaun 16.000-resin iha territóriu Laclubar nian, ne’e hatudu populasaun hela uitoan mak seidauk asesu bee-moos,” nia hateten.
Maibé, nia dehan, bainhira kompañia lokál ne’e halo kanalizasaun bee-moos no konstrui tanke bee-moos nian bele responde ona pursentu kiik hosi 75% ne’e.
Postu administrative Laclubar iha suku neen (6) mak hanesan Batara, Fatumakerek, Funar, Manelima, Orlalan no Sananain ho nia populasaun 16.000-resin.
Jornalista : Osória Marques
Editór : Cancio Ximenes
