VIQUEQUE, 18 maiu 2023 (TATOLI)—Governu liuhosi Ministériu Edukasaun Juventude no Desportu (MEJD), kinta ne’e, inaugura projetu komunitáriu reabilitasaun no konstrusaun infraestutura eskola hamutuk 12 iha munisípiu Viqueque.
Tema ba serimónia ne’e ‘liuhosi infraestutura bázika ne’ebé di’ak, mai ita hametin sistema edukasaun ho kualidade hodi lori jerasaun meleniál ne’ebé kualifikadu, kreativu no inovativu hodi hasoru mundu dijitál.’
Biban ne’e, Vise-Ministru Edukasaun Juventude no Desportu, António Guterres, admite katak grupu komunitáriu sira hasoru difikuldade oin-oin durante prosesu la’o maibé ho responsabilidade konsege realiza serbisu.
“Ha’u hakarak agradese ba responsável grupu no profesór sira tanba harii ona edifísiu eskola ba ita-nia oan sira uza hodi halo prosesu aprendizajen. Ha’u haree eskola sira iha munisípiu Viqueque kuaze 98% maka hadi’a ona, iha eskola balun seidauk hadi’a maibé tempu ruma ita sei hadi’a hotu,” governante ne’e hateten ba Agência Tatoli, iha resintu Eskola Bázika Filiál (EBF) Uaibua, Viqueque.
Notísia Relevante: Eskola lima Viqueque seidauk implementa projetu komunitáriu tanba kondisaun estrada
Vise-Ministru dehan, tékniku sira nafatin halo levantamentu dadus ba eskola sira ne’ebé ho kondisaun grave no presiza hadi’a, nune’e bele halo planu orsamentu.
“Ohin Administradór munisípiu Viqueque husu Ministériu Edukasaun atu kria mós kuziña no bee-moos, maibé ba ida-ne’e Governu foun mai mak bele tau ba prioridade ministériu nian,” nia akresenta.
Vise-Ministru husu responsável eskola sira atu kuidadu ho edifísiu foun, nune’e bele uza iha tempu naruk.
Nune’e mós, Administradór munisípiu Viqueque, Januário Soares ‘Bolly’, agradese ba MEJD ne’ebé bele responde nesidade komunidade Viqueque ninia oan hodi harii eskola ba estudante sira uza ba prosesu aprendizajen.
“Ha’u agradese ba Governu liuhosi Ministériu Edukasaun ne’ebé harii ona eskola sira iha Viqueque. Mask harii ona edifísiu sira, maibé ha’u sente seidauk to’o, presiza kompleta tan edifísiu balun,” nia hato’o.
Antes ne’e, Vise-Ministru Edukasaun Juventude no Desportu, António Guterres, halo lansamentu fatuk dahuluk ba edifísiu eskola Ensinu Sekundáriu Jerál (ESJ) Olocasa, iha loron 11 fevereiru 2022, ne’ebé reprezenta eskola 18 iha suku Ossu de Cima, postu administrativu Ossu, munisípiu Viqueque, ne’ebé seidauk hadi’a.
Hosi projetu kominitáriu iha munisípiu Viqueque hamutuk eskola 18, iha obra 12 maka finaliza ona hanesan Eskola Pré-Eskolár (EPE) Uaibua Ossu, ESJ Olokasa Ossu, EBF Uaimori Viqueque Villa, EPE Maria Lobato Viqueque Vila, EBC Cabira-oan Viqueque Vila, EBF Debuisi Uatolari, EBC Uatucarbau, EBF Nahae Uatolari, EBC 07 Uatolari, EBF Ualake Uatolari, Eskola Sekundária Tékniku Vokasionál (ESTV) Kalo-Heda Uatolari no ESJ Uatucarbau, enluantu eskola neen seidauk finaliza.
Projetu komunitáriu responsabiliza hosi grupu komunitáriu ida-idak, ne’ebé Governu transfere orsamentu ba konta bankária kada grupu ho kustu totál $1.781.991,94 ba eskola 18.
Iha serimónia ne’e, Vise-Ministru Edukasaun Juventude no Desportu entrega plaka ba responsável eskola 12 iha munisípiu Viqueque.
Atividade ne’e partisipa hosi Autoridade lokál, responsável Servisu Edukasaun Viqueque, profesór, estudante inklui inan aman sira.
Jornalista : Vitorino Lopes da Costa
Editora : Julia Chatarina
