DILI, 18 maiu (TATOLI)—Observadór Internasionál hosi organizasaun Rede Órgaun Eleitorál (ROJAE) Komunidade Nasaun Ko’alia Lian Portugés (CPLP, siglá portugés) hamutuk na’in-13 sei halo observasaun ba prosesu eleisaun parlamentár iha Timor-Leste ne’ebé sei akontese iha 21 maiu 2023.
Vise Prezidente Komisaun Nasionál Eleisaun (CNE, siglá portugés), Domingos Barreto, hateten ohin observadór mai atu kumprimenta Prezidente Repúblika no rona mós lia-menon hosi PR kona-ba preparasaun eleisaun parlamentár.
“Ekipa delegasaun ne’e foin to’o mai horisehik, ne’ebé sira seidauk hateten buat barak. Tanba, sira foin primeiravés mai observa Timor-Leste nia eleisaun parlamentár iha 21 maiu mai ne’e. Delegasaun hamutuk 13, ne’ebé sei fahe ba postu administrativu sira koloka ema na’in ida-ida,” Vise Prezidente CNE ne’e hateten ba jornalista sira hafoin akompaña observadór CPLP ramata enkontru ho Prezidente Repúblika iha Palásiu Prezidensiál nIcolau Lobato, Bairru Pite, kinta ne’e.
Observadór Internasionál ROJAE-CPLP hosi Komisaun Nasionál Eleisaun Cabo Verde, Cristina Leite, hateten ohin sira-nia parte hala’o vizita mai iha Prezidente Repúblika antes hala’o observasaun ba eleisaun parlamentár.
“Ami nu’udar entidade ne’ebé ami simu kortezia hosi Prezidente Repúblika, tanba ne’e laiha asuntu ruma ne’ebé ami diskute ho Prezidente Repúblika,” nia dehan.
Durante enkontru, Xefe Estadu hato’o katak observadór internasionál mai haree kondisaun nasaun Timor-Leste atu halo observa ba eleisaun parlamentár ho mós ninia preparasaun sira.
Jornalista : Nelson de Sousa
Editór : Cancio Ximenes
