DILI, 18 maiu 2023 (TATOLI)—Prezidente Repúblika, José Ramos Horta, tersa (16 maiu 2023) ne’e, apoia nesessidade bázika no materiál seluk ba komunidade no ema kbiit laek balun iha postu administrativu Laga no Quelicai, munisípiu Baucau.
“Ha’u sempre buka apoia komunidade sira-ne’ebé ki’ak. Baibain ne’e la’ós responsabilidade Prezidente nian, loloos ne’e Governu liuhosi Ministériu Solidariedade Sosiál no Inkluzaun (MSSI) nia kompeténsia, maibé todan barak loos no Governu nia serbisu barak, entaun mak ha’u sempre haree oinsá Prezidénsia mós bele buka kontribui para hakmaan povu nia terus no Governu nia todan,” PR Horta hateten liuhosi komunikadu imprensa ne’ebé Agéncia Tatoli asesu hosi mídia Palásiu Prezidensiál, kinta ne’e.
Iha primeiru mandatu Prezidente Repúblika nian (2007 – 2012), fó ona apoiu bá komunidade sira, tan ne’e apoiu ne’e laiha motivu polítiku.
“Ne’eduni, ha’u mai tanba tempu iha no sei ajuda komunidade seluk, balun ha’u seida’uk bá, ajuda tiha ho sira para haruka sasán lubuk ida ba maibé dook tebe-tebes. Iha Bobonaru ne’ebá, maibé iha aldeia ida izoladu tebe-tebes, maibé ha’u sei ba to’o iha ne’ebá, haree sira no fatin seluk tan,” nia dehan.
Iha Postu Administrativu Laga, Xefe Estadu oferese sasán nesesidade bázika, televizaun ida, solár panel ida no kadeira 50 ba komunidade iha suku Soba.
Xefe Suku Soba, Françisca Mónica de Fátima Soares, hato’o agradesimentu ba apoiu ne’ebé oferese hosi Prezidénsia Repúblika.
“Kona-ba solár sel, kona-ba umanitáriu, kona-ba meza kadeira ne’ebé mak Prezidente Repúblika fó, ida-ne’e hanesan domin ida-ne’ebé mak bele fó ba ami iha suku ida-ne’e. Tanba, Prezidente nia liafuan ida-ne’ebé mak uluk hateten iha ne’e, bainhira ha’u ba tuur iha Bairru Pitr, ha’u la haluha aldeia ida-ne’e. Ne’ebé, ha’u agradese tebe-tebes ba Prezidente Repúblika ne’ebé mak bele mai tan dala ida iha ami-nia fatin ida-ne’e,” nia dehan.
Iha postu administratibu Quelicai, Prezidente Repúblika, José Ramos Horta, mós fó apoiu sasán nesessidade bázika ba komunidade kbiit laek sira iha suku Baguia.
“Ami kontente tanba primeir-Ves Prezidente Repúblika mai vizita suku ida ne’e. Dezde ukun aan to’o agora foin mak ami hetan vizita ofisiál ida ne’e, dala ida-tan hanesan Xefe Suku agradese tebes ba Prezidente tanba ho vizita ida ne’e bele lori mos nesidade bázika ba ha’u nia komunidade kbi’it laek iha suku ida ne’e,” Xefe Suku Baguia, Postu Administrativu Quelicai, Munisípiu Baucau, Hermigildo Ximnenes, agradese.
Foin lalais ne’e, Prezidente Repúblika, José Ramos-Horta, akompañadu hosi Embaixador Korea Súl iha Timor-Leste, Shin Mantaek, fó apoiu nesessidade bázika bá orfonatu Padre no Madre sira iha Aileu inklui SOLS iha Same, Manufahi.
Jornalista : Nelson de Sousa
Editór : Cancio Ximenes
