iklan

NASIONÁL, POLÍTIKA

PR Horta oferese tratór ida ba Eskola TEKVOK Fatumaca

PR Horta oferese tratór ida ba Eskola TEKVOK Fatumaca

Prezidente Repúblika (PR), José Ramos Horta, vizita no oferese tratór bá Eskola Ensinu Sekundáriu Tékniku Vokasionál (TEKVOK) Fatumaca-Gariuai-Baucau, hodi fasilita programa fila-rai no halo to'os, tersa (16 maiu 2023). Imajen/Mídia PR.

DILI, 18 maiu 2023 (TATOLI)—Prezidente Repúblika (PR), José Ramos Horta, tersa (16 maiu 2023) ne’e, vizita no oferese tratór bá Eskola Ensinu Sekundáriu Tékniku Vokasionál (TEKVOK) Fatumaca-Gariuai-Baucau, hodi fasilita programa fila-rai no halo to’os.

Diretós Eskola TEKVOK Fatumaca, Pe. David Sávio, SDB, sente kontente ho apoiu ida-ne’e, tanba bele tulun sira hodi hala’o atividade agríkola iha koléjiu Fatumaca no mós fasilita povu agrikultór sira-ne’ebé besik koléjiu Fatumaca.

“Hosi koléjiu ami sente kontente, tanba tratór ne’ebé Prezidente Repúblika entrega mai ami, ida-ne’e bele tulun tebe-tebes ami iha ami-nia serbisu agríkola nian,” Padre David Sávio hateten liuhosi komunikadu imprensa ne’ebé Agência Tatoli asesu hosi mídia Prezidénsia Repúblika, kinta ne’e.

Durante ne’e, iha tratór 20-resin mak Koléjiu Fatumaca utiliza bá hala’o atividade agríkola, maibé daudaun ne’e kondisaun avaria hotu, nune’e difikulta sira atu uza bá fila-rai atu kuda batar.

“To’os ne’ebé ami halo iha ne’e, prátikamente ami uza batar no buat hotu-hotu ne’ebé ami iha ne’e, ami uza atu bele sustenta koléjiu, depois mak tulun mós povu ne’ebé mak besik hela iha ne’e, ne’ebé lahetan hahan ne’ebé sufisiente,” Padre David dehan

Tratór refere mós la’ós uza de’it bá atividade agríkola iha koléjiu Fatumaca nian, maibé ajuda mós hodi fila-rai povu agrikultór sira iha área ka zona Fatumaca nian mak hanesan iha suku Gariuai, Uailili, Buibau, Samalari (postu Baucau Vila), Ostico no Luilubo (postu Vemasse).

Entretantu, kada tinan, koléjiu Fatumaca prodús batar hamutuk bidon 200 to’o 300-resin, no batar hirak ne’e oferese mós bá povu agrikultór sira no balun ba uza ba konsumu iha koléjiu Fatumaca nian.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!