iklan

NASIONÁL, HEADLINE, KAPITÁL

SEFOPE haruka ona traballadór 1.301 bá Austrália desde janeiru-maiu 2023

SEFOPE haruka ona traballadór 1.301 bá Austrália desde janeiru-maiu 2023

Diretór Nasionál Empregu Exteriór SEFOPE, Filomeno Soares. Imajen Tatoli/Egas Cristóvão

DILI, 18 maiu 2023 (TATOLI)Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE) haruka ona traballadór hamutuk 1.301 bá serbisu iha Austrália durante fulan-haat  nia-laran, hahú hosi janeiru to’o maiu 2023.

“Númeru ne’e inklui ona traballadór na’in-18 ne’ebé ohin asina tan deklarsaun atu bá serbisu iha Austrália,” Diretór Diresaun Nasionál Empregu Exteriór, Filomeno Soares, hateten iha salaun DNEE, Becora, kinta ne’e.

Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália

Enkuantu, traballadór sira ne’ebé hetan ona oportunidade serbisu iha Austrália hahú hosi tinan 2012 to’o 2023 hamutuk 9.938.

“Hosi númeru ne’e, ita-nia traballadór sira ne’ebé sei serbisu iha Austrália 3.743, fila mai ona Timor 4.912 no sira ne’ebé durante serbisu hetan asidente to’o mate hamutuk na’in-haat,” nia relata.

Haree ba númeru traballadór ne’ebé kontinua hetan oportunidade serbisu iha Austrália sempre aumenta, Diretór husu traballadór na’in-18 ne’ebé hetan tan oportunidade asina deklarasaun ho SEFOPE hodi bá serbisu, tenke kuidadu-an no respeita regulamentu sira ne’ebé iha liu-liu labele sees hosi sistema.

“Asina deklarasaun ne’e hanesan konkordásia ida hosi família traballadór katak prontu ona atu hosik oan, fen, laen atu ba serbisu iha Austrália la’os Governu mak obriga, nune’e bainhira mosu problema ruma, parte rua iha hotu responsabilidade hodi rezolve. Maibé ita husu nafatin labele sees hosi sitema nune’e imi-nia vida garante nafatin no bele fila mai hadi’a ekonomia família nian” nia dehan.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!