iklan

ERMERA, MUNISÍPIU

UDT sei fahe mákina dulas kafé ba kada suku iha Ermera

UDT sei fahe mákina dulas kafé ba kada suku iha Ermera

UDT iha Ermera (Imagem Tatoli/Filomeno Martins)

ERMERA, 18 maiu 2023 (TATOLI)Partidu União Demokratica Timorese (UDT) iha ninia kampaña eleitorál ikus iha munisípiu Ermera kompromete katak bainhira povu Ermera fó fiar kaer ukun, sei distribui mákina dulas kafé kulit tasak ba suku hotu iha Ermera laran tomak.

“Ita buka atu serbisu ho kafé nain sira atu bele entende malu didiak hodi rezolve problema kafé iha munsípiu Ermera. Ukun-an tinan 20 ona maibé fatin barak iha Ermera mak sei uza nafatin mákina manual dulas kafé,” Sekretáriu Jerál UDT, Nicson Lay hato’o iha kampaña ikus UDT nian, iha Salão Paroquial Gleno, munisípiu Ermera, kinta ne’e.

Nia dehan bainhira kaer ukun, Governu sei kontaku ho líder lokál kada suku hodi desidi fatin hatuur mákina dulas kafé ho enerjia.

“Autoridade lokál no toos nain sira sei perpara fatin iha kada suku, Governu liu husi ministériu relevante sei kria kondisaun hodi instala mákina no entrega ba povu no autoridade lokál. Atu nune’e, ema ida labele sente katak buat ne’ebé guvernu fo ne’e ba de’it nia,” Nicson esplika.

Nia informa katak mákina ne’e sei instala enome kafekultór tomak iha suku ida, atu nune’e ema hotu sente sai nain ba mákina ne’ebé mak governu oferese.

“Hamutuk ho komunidade kafé, ita sei kria mekanizmu ida hodi halo tratamentu ba kafé ho di’ak hodi garante kualidade orgániku kafé Timor,” Nicson akresenta.

Nia dehan UDT mós iha programa ba reabiliatasaun plantasaun kafé ne’ebé mak tuan no la produtivu.

“UDT hakarak konsentra liu ninia programa ba munisípiu Ermera mak reabilita plantasaun kafé iha munisípiu Ermera ne’ebé mak moris ho tempu naruk ona,” Nicson dehan.

Iha kampaña ne’e UDT mós kompromete atu tau matan ba veteranu no veterana sira ne’ebé mak dedika sira-nia an ba auto-determinasaun.

“Se povu tau fiar, UDT hakarak fó prioridade ida aas liu atu valoriza no tau veteranu no vetrana sira iha fatin ida dignu iha rai ida ne’e,” líder ne’e kompremete.

Iha fatin hanesan UDT mós  kompromete sei dezenvolve Estrada rurál iha Ermera

Sekretáriu Jerál, Nicson Lay hateten Estrada diresaun kapitál Dili ba munisípiu sira di’ak ona, maibé persiza dezenvolve tan Estrada rurál ne’ebé mak liga husi suku ba postu no munisípiu sira.

Nia kompromete katak se povu Ermera fó fiar, UDT sei hadi’a Estrada diresaun Postu Administrativu Letefoho ba Glenu, Estrada Diresaun Postu Administrativu Ermera ba Glenu no Estrada husi suku Urahou no suku Mau-Ubo ba postu Adminsitrativu Hatulia B no Postu Adminsitrativu Ermera.

“Dezenvolvimentu ba ita-nia Estrada liga husi suku ba postu administrativu no munisípiu sira sei dook husi povu nia esperansa,” Nicson hato’o kompromisiu polítika ne’e iha kampaña ikus UDT nian iha Salão Paroquial Gleno, munsípiu Ermera, kinta ne’e.

Nia dehan tanba ne’e mak UDT sei tau dezenvolvimentu Estrada rurál hanesan prioridade aas liu iha programa UDT bainhira kaer ukun iha IX Governu.

“UDT nia prioridade ba infraestrutura bázika ne’e sei konsentra ba konstroi no reablita Estrada rural sira ne’ebé mak iha kondisaun ladiak,” Nicson akresenta.

Líder polítiku ne’e hato’o katak bainhira Estrada di’ak sei lori dezenvolvimentu oi-oin besik liu ba povui.

“Ita sei tau investimentu bo’ot ba Ministériu Obras Públiku hodi estabelese Jestaun Ekipamentu Pezadu iha munisípiu hotu hodi fó apoiu ba komunidade rurál bainhira akontese dezastre naturál. Ohin akontese dezastre naturál, ita bele mobiliza kedas ekipamentu pezadu sira atu normaliza kedas situasaun Estrada,” Nicson informa.

 

Jornalista: Filomeno Martins

Editora: Nelia Borges

iklan
iklan

Leave a Reply

iklan
error: Content is protected !!