VIQUEQUE, 19 maiu 2023 (TATOLI)— Administradór munisípiu Viqueque, Januário Soares ‘Bolly’, husu ba populasaun munisípiu Viqueque atu nafatin kria pás no establidade iha festa demokrasia, Eleisaun Parlamentár iha loron 21 maiu 2023.
“Ba komemorasaun loron restaurasaun independénsia ne’e, ha’u hakarak husu ba populasaun hotu atu kria pás no establidade iha ita-nia munisípiu no entre sidadaun sira hotu. Eleitór sira labele hamosu konfuzaun, hein de’it rezultadu eleisaun tenke simu partidu ida-ne’ebé mak manán iha eleisaun,” Autoridade munisípiu Viqueque hateten ba Agência Tatoli, iha ninia knaar fatin, munisípiu Viqueque, sesta ne’e.
Nia dehan, komemorasaun loron istóriku ba tinan ne’e iha munisípiu Viqueque la realiza atividade ruma.
“Ita halo de’it serimónia simples dada bandeira hotu, ita kontinua halo distribuisaun materiál eleisaun ba sentru votasaun no estasaun votu. Tanba komemora 20 maiu ne’e ita mós iha festa demokrasia ba Eleisaun Parlamentár, tanba ne’e ita la halo atividade,” nia akresenta.
Notísia relevante : Tinan 20 Restaurasaun Independénsia, Timor-Leste sei depende importasaun husi rai liur
Aleinde ne’e, membru Governu sira mós sei la partisipa hanesan akontese kada tinan maibé Administradór munisípiu sira mak sai inspetór ba komemorasaun loron nasionál.
Serimónia sei partisipa hosi Diretór Sekretariadu Tékniku Administrasaun Eleitorál (STAE), Diretór Komisaun Nasionál Eleisaun ( CNE, sigla portugés), inklui Polísia Nasionál Timor-Leste (PNTL) munisípiu Viqueque.
Atividade Isar bandeira RDTL sei hahú tuku 08:00 dadeer iha resintu Administrasaun munisípiu Viqueque no ramata atividade sei kontinua distribui materiál ba sentru votasaun 112 no estasaun votu 135.
Jornalista : Vitorino Lopes da Costa
Editora : Julia Chatarina
