iklan

JUSTISA, BOBONARO, HEADLINE, LEI, MUNISÍPIU, SEGURANSA

Kazu baku joven iha Malilait, PNTL submete ona ba Ministériu Públiku

Kazu baku joven iha Malilait, PNTL submete ona ba Ministériu Públiku

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

MALIANA, 19 maiu 2023 (TATOLI)- Kazu ne’ebé deskonfia Vise-Ministru Administrasaun Estatál (MAE), Lino de Jesus Torrezão, baku joven ida naran Dionísio Fátima Barros, iha suku Malilait, postu administrativu Bobonaro, komandu polísia munisípiu Bobonaro liuhosi seksaun investigasaun, submete ona Ministériu Públiku (MP) atu kontinua prosesu tui lei.

“Kazu ne’e ohin entrega kedas ba ita-nia prokuradór munisípiu hodi halo inkéritu no rejistu kedas ho NUC 0003/23.BBBBB, agora ita hein prosesu mai oin tán, ninia prosesu sei kle’an lori hatene ninia motivu loloos, akontesimentu ne’e tanba saida bele mosu buat ne’e,” Komandante PNTL munisípiu Bobonaro, Superitendente Xefe Antoninho Mauluta, ko’alia iha Maliana, sesta ne’e.

Mauluta haktuir, informasaun ne’ebé PNTL eskuadra Bobonaro rekolla hosi vitima katak, iha loron-kinta (18/05) kalan iha serimónia haan hamutuk família nian, hafoin ida-ne’e  prienxe mós ho atividade animasaun dansa to’o iha madrugada 02:00, loron sesta (19/05).

“Ita-nia alin joven ne’e mós ba partisipa iha festa ne’e, depois nia dansa tebe-tebe, nia mos deklara nia-an katak, nia só hatudu nia liman fuan rua de’it, derrepente de’it nia hetan tuku hosi ita-nia nai-ulun boot hosi governu nian, tuku direita kedas nia oin no kona inus-kain rezulta raan fakar,” nia haktuir

Hafoin akontesimentu membru polísia sira lori kedas joven ne’e ba halo tratamentu intensivu iha Sentru Saúde Komuntária Bobonaro.

“Kalan ne’e tratamentu, depois sira mai husu kona-bá prosesu, ha’u mós orienta kedas, kazu ne’e aban depois imi tratamentu, imi heta visum, investigasaun maka bele kaer kazu ne’e, entrega kedas ba ita-nia polísia ne’ebé ligasaun ho Ministériu Públiku, nia mak kaer direita prosesu ne’e ba alin ne’ebé hetan tuku,” Komandante ne’e dehan.

Nune’e rosesu kontinuasaun hosi kazu ne’e sei hein notifikasaun hosi prokuradoria munisipál Bobonaro.

“Tuir ami-nia haree katak alin joven ne’e ketak, ita nia ulun-boot ne’e mós ketak, sira iha pozisaun la hanesan iha partidu, maibé ha’u hanoin iha prosesu mak ita bele haree no hodi hatene loloos,” nia informa.

“Ami mak kaer tanba kazu ne’e ami haree nia grau ne’e aas oituan, tanba liga ho suspeitu ne’ebé iha ninia nível ne’e altu, pozisaun iha membru governu. Ida+ne’e mak ha’u orienta tenke lori mai munisípiu mak tenke kaer direita,” Komandante ne’e katak.

Notísia relevante: Mauluta husu joven sira koopera ho PNTL Bobonaro kontrubui pás iha eleisaun parlamentár

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!