PNTL Covalima prontu asegura sidadaun ezerse direitu votu iha eleisaun Parlamentár
COVALIMA, 19 maiu 2023 (TATOLI)–Polísia Nasionál Timor-Leste (PNTL) Covalima, prontu atu asegura sdurante sidadaun sira ezerse direitu votu iha sentru votasaun no estasaun votasaun iha eleisaun parlamentár ne’ebé sei realiza iha 21 maiu 2023.
“Polísia Nasionál Timor-Leste (PNTL) Covalima prontu atu asegura sidadaun sira ezerse sira-nia direitu votu iha eleisaun parlamentár. Ohin, 19 maiu 2023, bazeia ba ita-nia prezidente dekreta ona katak, loron 21 fulan-maiu loron eleisaun parlamentár,” Komandante PNTL Munisípiu Covalima, Superintendente Basílio de Jesus, hateten liuhosi nia diskursu bainhira hala’o formatura jerál iha komandu PNTL Covalima, sesta ne’e.
Ho nune’e, Estadu entrega konfiansa ba iha Falintil Forsa Defeza Timor-Leste (F-FDTL) no Polísia Nasionál Timor-Leste (PNTL), tanba ne’e loron 19 maiu loron feriadu ba komunidade Timor-Leste hodi prepara aan ba eleisaun parlamentár.
Iha nia diskursu, komandante ne’e mós fó hanoin ba ajente seguransa sira katak eleisaun parlamentár ne’ebé hetan apoiu másimu hosi pesoál sira hodi mai koloka iha sentru votasaun 80 hodi asegura ho di’ak.
“Ho esperénsia ne’e, sai sasukat ba seguransa ne’ebé ita atu hala’o iha eleisaun parlamentár, ita la mesak, forsa rua sei reforsa iha kualker situasaun,” nia dehan.
PNTL nia papél hanesan ajente ba seguransa mantein lei no ordem hodi garante seguransa iha loron eleisaun parlamenár, atu responde kualker situasaun mai hosi indivu no grupu kriminozu balun ne’ebé organizadu tenta atu destroi establidade iha loron eleisaun.
“Ohin, ita prepara ita-nia aan hakarak hatene lo-los kada pesoál iha ona ordem atu koloka ba iha sentru votasaun 100 ne’ebé estabelese iha munisípiu Covalima, pesoál sira ho kondisaun prontu hodi hatudu nia protidaun,” nia hateten.
Tanba ne’e, nia husu ba ajente seguransa labele duvida atu halo atuasaun iha kualker situasaun tenke prontu atu atua situasaun no ajente seguransa labele halo diskuasaun kona-ba partidu polítiku.
Iha serimónia formatura jerál ne’e, komandante PNT prega fita ba membru PNTL ho kór rua ba sira hanesan kór verde ho nia signifika karáteristika operasionál kualker tempu prontu, fita kór mean ho nia sentidu labele dúvida atu halo asaun.
Bazeia ba konstituisaun RDTL artigu 147 hodi ko’alia kona-ba Polísia no forsa seguransa sira ne’ebé iha alinea dahuluk hateten, Polísia sei defende legalidade demokrátiku no garante sidadaun sira-nia seguransa interna maibé sira labele iha partidu polítiku.
Ali\nea daruak hateten, Prevensaun kriminál tenke hala’o ho respeitu ba direitu umanu no alinea ba datoluk hakyuir lei mak sei harii rejime ba polísia no mós forsa seguransa seluk.
Jornalista : Celestina Teles
Editór : Cancio Ximenes
