iklan

NASIONÁL, POLÍTIKA

PR Horta husu MP investiga sidadaun Indonézia asesu kartaun eleitorál

PR Horta husu MP investiga sidadaun Indonézia asesu kartaun eleitorál

Prezidente Repúblika, José Ramos Horta. Imajen Tatoli/Egas Cristovão.

DILI, 19 maiu 2023 (TATOLI)—Prezidente Repúblika, José Ramos Horta, husu ba Ministériu Públiku atu investiga sidadaun Indonézia na’in-rua (2) ne’ebé asesu kartaun eleitorál ne’e krime eleitorál, tanba ne’e akuzasaun ida no halo alegasaun ida sériu.

Notísia Relevante: KHUNTO keixa polémika sidadaun Indonézia asesu kartaun eleitorál ba MP

“Ida-ne’e krime eleitorál, krime halo falsifikasaun ida. Kuidadu ema balun ba Becora tanba halo karta falsifikasaun ba karta kondusaun no balun halo falsifikasaun sertidaun idade. Entaun, falsifika eleitorál ne’e nune’e nia sidadaun Indonézia tan. Tanba ne’e, sé mak halo tenke simu nia konsekuénsia tanba ne’e krime grave,” Xefe Estadu hateten ba jornalista sira, hafoin partisipa workshop Internasionál kona-ba hametin demokrásia, iha Hotel Novo Turismo, Dili, sesta ne’e.

Xefe Estadu hateten, timoroan sé mak fasilita sidadaun Indonézia na’in-rua ne’e asesu kartaun eleitorál Timor-Leste nian ne’e tenke simu nia konsekuénsia.

“Tanba Indonézia la permite dupla nasionalidade, la’ós hanesan Timor iha passaporte rua tolu. Sira sidadaun Indonézia duni, entaun eleitorál ne’e sé mak fó, ne’e krime, krime sériu ida. Ha’u rona ida-ne’e, maibé ha’u rasik lahatene informasaun konkretu ruma. Ha’u haree iha mídia sidadaun na’in-rua, ema timoroan parese, maske nasionalidade Indonézia ona.

Prezidente Komisaun Nasionál Eleisaun (CNE), José Agostinho Belo, husu Prokuradória atu halo investigasaun klean ba sidadaun na’in-rua ne’ebé falsifika dokumentu.

“Kona-ba sidadaun na’in-rua ne’ebé falsifika dokumentu ne’e, agora daudaun ne’e keixa iha tiha ona prokuradória. Ha’u hanoin prokuradória tenke hola ona medida tanba kazu ne’e sériu no CNE simu ona kopia ne’ebé ami haree hela nafatin. Maibé husu para halo ona investigasaun kle’an. Tanba, ida-ne’e parte hosi fraude eleitorál ne’ebé iha,” José Agostinho da Costa Belo hateten.

Prezidemte CNE ne’e hateten, presiza halo medida ne’ebé forte hodi nune’e futuru labele akontese tan.

“Tanba ne’e, ami sériu hakarak envolvimentu eleitorál ne’e ita presiza halo medida, nune’e partidu polítika no sidadaun sira hotu tenke la’o no foti medida, nune’e ba oin labele akontese tan,” nia hateten.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!