CNE husu PNTL Bobonaro atua polítiku sira-ne’ebé kontinua dor to dor iha baze
MALIANA, 20 maiu 2023 (TATOLI)-Komisáriu hosi Komisaun Nasionál Eleisaun (CNE, sigla portugés), destakadu munisípiu Bobonaro, Domingos Barreto, husu Polísia Nasionál Timor-Leste (PNTL), munisípiu Bobonaro, atu kontrola polítiku sira-ne’ebé sei halo aktvidade dor to dor partidu nia iha baze, tanba agora iha hela loron hakmatek nia laran.
Tuir informasaun ne’ebé Vise-Prezidente CNE ne’e asesu katak iha partidu polítiku balu mak sei kontinua halo hela atvidade liuliu iha tempu kalan.
Notísia relevante: CNE Bobonaro husu ofisiál eleitorál 1.700 iha serbisu ho imparsiál
“Ha’u alerta ba membru PNTL sira tau matan ba partidu balu agora sei la’o kalan, balu sei la’o karik fó hatene agora laiha ona atividade, ne’ebé ha’u alerta tán dala-ida, atu para no kumpre lei,bpartidu ne’ebé viola kuandu ami kaer toman sei prosesu, ne’e kontra lei, loron hakmatek ne’e laiha tán atividade tama sai uma,” nia hateten iha edifísiu STAE Bobonaro, sábadu ne’e.
Komandante PNTL munisípiu Bobonaro, Superintendente Xefe Antoninho Mauluta, hateten komandu hatún ona orden ba ekipa ida halo movimentu ba mai atu haree situasaun ne’e.
“Komesa orsida kalan ami sei aperta, ami sei movimentu, ami atu hasoru iha karreta balu movimentu fora hosi aktvidade ne’ebé ita atu halo, sé fora hosi ida-ne’e, ami sei halo apreensaun, tanba ohin kalan hakmatek,” nia katak.
Mauluta apela ba parte hotu-hotu liuliu partidu polítiku no líder arte-marsiál sira atu koopera ho PNTL nune’e bele kontribui ba susesu eleisaun parlamentár hodi hatudu ba munisípiu sira seluk katak Bobonaro mós bele garante pás no estabilidade.
Notísia Relevante:CNE Bobonaro husu afiliante sira ‘labele insulta partidu anteriór’
Jornalista: Sergio da Cruz
Editór: Evaristo Soares Martins
