Governu apela ba STAE-CNE hala’o servisu bazeia ba lei
COVALIMA, 20 maiu 2023 (TATOLI)–Ministru Administrasaun Estatál (MAE), Miguel Pereira de Carvalho, apela ba órgaun administrasaun eleitorál hansesan Komisaun Nasionál Eleisaun (CNE-sigla portugés) no Sekretáriu Tékniku Administrasaun Eleitorál (STAE) hala’o servisu bazeia ba lei.
“Eleisaun parlamentár sei hahú loron 21 fulan-maiu 2023, ohin, ita hotu partisipa serimónia distribuisaun materiál, ha’u apela ba órgaun administrasaun eleitorál, Komisaun Nasionál Eleisaun (CNE-sigla portugés) no Sekretqridu Tékniku Administrasaun Eleitorál (STAE) hala’o ita-boot sira-nia funsaun konforme sa ida mak lei estipula ona,” Ministru Administrasaun Estatál (MAE), Miguel Pereira de Carvalho, hato’o apelu ne’e iha diskursu iha resintu AMC, sábadu ne’e.
Ho nune’e, membru Governu ne’e dehan STAE hanesan atu ezekuta eleisaun tuir lei eleitorál no regulamentu bazeia ba eleisaun jerál parlamentár 2023, prinsipal ba brigada no ofisiál sira hala’o servisu hahú ohin.
“Ha’u hatene loron ida-ne’e no tuir mai ita-boot sira sei liuhosi dalan ne’ebé defísil enfrenta situasaun jeográfika oioin maibé STAE iha ona esperénsia ha’u fiar katak realiza eleisaun ida-ne’e ho di’ak,” nia dehan.
Aleinde apela ba brigada sira, governante ne’e mós apela ba Komisaun Nasionál Eleisaun (CNE-sigla portugés) ezerse funsaun ho di’ak, nune’e eleisaun la’o ho tranparánsia nune’e rezultadu eleisaun ho kredivél.
Tuir dadus ba eleisaun parlamentar tinan ne’e, Sekretariadu Tékniku Administrasaun Eleitorál STAE Covalima estabelese sentru votasaun 100 no estasaun votasaun 120 iha munisípiu Covalima.
Entertantu, bazeia ba dadus ne’ebé fó sai hosi Sekretariadu Tékniku Administrasaun Eleitorál (STAE) Covalima katak, eleitór ne’ebé elizivél atu ezerse direitu votu iha munisípiu Covalima hamutuk 49,299.
Jornalista : Celestina Teles
Editór : Cancio Ximenes
