Governu husu sidadaun hotu halo reflesaun kore povu hosi mukit
COVALIMA, 20 maiu 2023 (TATOLI)–Ministru Administrasaun Estatál (MAE), Miguel Pereira de Carvalho, husu sidadaun hotu atu halo reflesaun relasioná tema prinsipal ba komemorasaun loron restaurasaun independénsia Timor–Leste ba tinan 2023 ne’ebé hateten “Hametin demokrásia hodi kore povu hosi mukit”.
“ohin, ita komemora tinan 21 restaurasaun independeisa. Iha momentu importante ida-ne’e, ha’u husu ba hotu-hotu atu halo reflesaun ida ba tema prinsipál hosi komemorasaun 20 maiu ba tinan ida-ne’e ni’an mak ‘hametin demokrásia hodi kore povu hosi mukit’. Tema ida-ne’e refleta tebes komemorasaun ba tinan ne’e,” Ministru Administrasaun Estatál (MAE), Miguel Pereira de Carvalho, hateten liuhusi diskursu bainhira sai inspetór serimónia isar banderia iha resintu AMC Covalima, sábadu ne’e.
Razaun presiza halo refrelasaun tema komemorasaun independénsia ba dala-21, tanba iha loron 21 maiu tinan 2023, Timor-Leste dala-ida tan, populasaun elizivél atu ezerse sira-nia direitu votu iha eleisaun parlamentár, nune’e forma sesta lejislatura.
“Ultra pasa ona tinan 24 loron referendu no tinan 21 restaurasaun independénsia, ohin loron dezenvolvimentu oioin akontese iha ita-nia rai, balun akontese ona, balun presiza mellora no balun presiza atu hadi’a no balun presiza atu halo tan, nune’e ita bele kore povu hosi mukit,” nia dehan.
Iha serimónia isar bandeira RDTL ne’e, membru Governu ne’e mós apela ba hotu-hotu atu halo reflesaun relasiona tema prinsipál komemorasaun independénsia 2023 maiu tinan 2023.
“Iha momentu importante ida-ne’e, ha’u apela ita hotu refleta tema prinsipál hosi komemorasaun independénsia ba dala-21 katak ita hotu presiza kontinua hametin demokrásia nune’e bele hasai povu mukit,” nia hateten.
Komemosaun 20 maiu tinan 2023 ho simples, tanba hafoin komemorasaun sei kontinua realiza serimónia hodi lansa distribuisaun materiál sensitivu no la’ós sensitivu ba sentru votasaun no estasaun votasaun ne’ebé estabelese iha munisípiu Covalima.
Jornalista : Celestina Teles
Editór : Cancio Ximenes
