PNTL Covalima la tolera grupu organizadu destroi estabilidade iha eleisaun parlamentár
COVALIMA, 20 maiu 2023 (TATOLI)– Komandante PNTL munisípiu Covalima, Superintendente Polísia Basílio de Jesus, hateten PNTL sei la tolera grupu organizadu no indivu sira-ne’ebé atu destroi estabilidade iha eleisaun parlamentár 21 maiu 2023.
“Ha’u hanesan komadante Munisípiu atu oriénta forsa seguransa hotu inklui forsa koordenasaun sei la fó espasu ba sé de’it, ba individu grupu kriminozu, krime organizadu tenta atu destroi estabilidade iha loron eleisaun. Ita sei la dúvida atu atua no responde ba situasuan ida-ne’e,” Superintendente Polísia Basilio de Jesus hato’o liuhosi diskursu bainhira partisipa iha serimónia komemorasaun 20 maiu no distribuisaun materiál eleisaun iha resintu AMC, sábadu ne’e.
Tanba, nia hateten, Timor-Leste komemora loron restaurasaun independénsia ba dala-21 ne’e atu timoroan hotu-hotu komprende no hatene ona regra no prosedimentu lei ne’ebé vigora iha Timor-Leste.
Papél seguransa hakerek ona iha konstituisaun RDTL artigu 147 define kona-ba funsaun polisiál no iha artigu 146 define funsaun Falintil Forsa Defeza Timor-Leste (F-FDTL) ne’ebé sai hanesan forsa ba nasaun ida-ne’e.
“Forsa seguransa ne’ebé ita destaka iha sentru votasun la’ós mesak maibé iha forsa rezerva no forsa koordenasaun, nune’e iha oras eleisaun ne’ebé asegura hosi seguransa apoiu mós forsa hosi koordenasaun. Nuune’e, husu ba CNE no STAE ajusta ita-boot sira-nia pensamentu ho seguransa no respeita regra hotu,” nia hateten.
Iha nia diskursu, Komandente ne’e mós fó sai aktu ne’ebé bandu iha sentru votasaun sira hanesan la uatoridade forsa serguransa no brigada sira atu joga karta halimar, hemu tua no seluk atu provoka situasaun.
Ho nune’e, nia hateten, brigasada sira tenke dixiplina tanba dixiplina sai xave ba susesu, no bainhira iha sentru votasaun sai autór ba aktu sira, sé mak atu foti medida
“Ha’u orienta ona forsa seguransa iha kualker tempu aktu ne’ebé mak indivivu no grupu halo la duvida atu foti desizaun, tanba la fó espasu ba sé de’it atu destroi estabilidade seguransa,” nia dehan.
Iha eleleisaun parlamentar tinan 2023 ne’e, Komandu PNTL Covalima destaka ba sentru votasaun hanesan Unidade Espesiál, Unidade Patruliamentu Fronteira (UPF), Unidade Polísia Maritima (UPM) no membru polísia Nasionál Timor-Leste iha komandu Munisípiu Covalima no forsa koordenasaun Falintil Forsa Defeza Timor-Leste (F-FDTL).
Jornalista : Celestina Teles
Editór : Cancio Ximenes
