DILI, 20 maiu 2023 (TATOLI)—Prezidente Repúblika (PR), José Ramos Horta, apela ba sidadaun ka eleitór hotu iha rai-laran no rai-li’ur ba vota iha eleisaun parlamentár ne’ebé sei akontese iha domingu (21 maiu 2023) aban.
Notísia Relevante: Prezidente Repúblika dekreta loron eleisaun Parlamentár iha 21 maiu
“Kompatriota sira, povu mak ha’u hadomi. Aban, ita hotu sei bá vota. Ha’u husu ba maluk sira hotu ho kartaun eleitorál atu ba vota tuir ida-idak nia direitu no obrigasaun nu’udar sidadaun,” PR Horta hato’o mensajen ne’e liuhosi nia diskursu iha serimónia komemorasaun loron restaurasaun indepedénsia 20 maiu ba dala-21 iha Palásiu Prezidensiál Nicolau Lobato, Bairru Pite, sábadu ne’e.
Xefe Estadu parabeniza ba instituisaun eleitorál hanesan Sekretaidau Tékniku Administrasaun Eeleitorál (STAE) no Comissão Nacional Eeleisaun (CNE) iha ida-idak nia fatin, tan hala’o kna’ar lalais no profisionál iha prosesu eleitorál nia laran.
“Ha’u fó parabéns mós ba polísia nasionál tan hala’o kna’ar ho imparsialidade iha prosesu eleitorál nia laran. Ha’u mós fó parabéns ba ita-nia forsa armada tuir serbisu ne’ebé hala’o tiha hodi fó tulun ba polísia nasionál hodi marka prezensa iha fatin loos,” nia hateten.
Horta mós parabeniza ba autoridade munisipál, xefe suku no xefe aldeia sira-ne’ebé badinas iha oin hodi kaer kna’ar ba lala’ok loro-loron iha rejiaun foho no mós iha bairru sidade kapitál nian.
“Ha’u hato’o parabéns no agradese ba Komisaun Justisa no Dame ba kontribuisaun ne’ebé fó iha prosesu edukasaun sívika no observasaun nomós fiskalizasaun iha prosesu eleitorál,” nia hateten.
PR agradese sistema Nasaun Unida nian no liuliu PNUD ba tulun tékniku ne’ebé fó prontu kedas hodi hala’o prosesu demokrátiku eleitorá, no agradese ba nasaun belun hirak-ne’ebé simu timoroan iha sira-nia rain no loke dalan ba maluk sira bele ba-mai hodi hala’o direitu eleitorál.
“Ha’u hato’o bem-vindo ba observadór internasionál sira-ne’ebé iha ita-nia leet, liuliu observadór sira hosi Union Government of Myanmar. Ita hotu hein katak la kleur demokrátika sei fila ba povu Myanmar,” nia dehan
Xefe Estadu hato’o obrigadu no parabeniza mídia nasionál tanba badinas no la kolen fó-an tomak hofi hato’o informasaun, hato’o mós obrigadu ba mídia internasionál sira.
Nia hateten, ba partidu polítiku hotu-hotu ne’ebé rejistadu ba eleisaun ida-ne’e atu la’o ho susesu.
“Balu sei halo festa no balu sei laran triste karik. Demokrásia hanesan duni. Vida la’o ba oin nafatin, nasaun ne’e mós sei la’o nafatin. Dezáfiu mesak boot, oportunidade mós boot. Nasaun presiza ita hotu. Sei laiha ema ida-ne’ebé lakon. Sei iha de’it ksolok ba ita-nia demokrasia ne’ebé maske joven hela maibé dinámika no buras abut ona iha ita-nia kultura no identidade,” nia hateten.
Xefe Estadu, parabeniza Prezidente Parlamentu Nasionál no Deputadu sira hotu, ba deputadu/a sira hotu nia produtividade lejislativa no ba kna’ar iha Lejislatura dalimak besik atu ramata.
“Ha’u agradese ita-boot Prezidente ba disponibilidade prontu kedas bainhira presiza hodi hala’o diálogu no kooperasaun institusionál,” nia dehan.
Horta hato’o mós parabens ba Primeiru Ministru, Taur Matan Ruak ba PM nia governasaun, tanba hatene hakat liu situasaun susar krize polítika, dezastre naturál, pandemia no kaer kuda-talin metin maske impaktu makaas hosi funu Ukránia ho konsekuénsia ba mundu no ba ita-nia povu.
Jornalista : Nelson de Sousa
Editór : Cancio Ximenes
