BAUCAU, 20 maiu 2023 (TATOLI) – Autoridade Administrasaun Munisipál Baucau liuhosi selebarasaun loron restaurasaun independénsia Timor-Leste ba dala-21 hakarak governu aselera podér lokál no desentralizasaun administrativa hodi lori dezenvolvimentu ba munisípiu.
Prezidente Autoridade Munisipál (PAM) munisípiu Baucau, Olivio ‘Bou-lesa’ Freitas, esplika, selebarasaun loron istóriku restaurasaun independénsia akontese tanba eroi no veteranu hotu nia kontribusaun liuhosi luta naruk hodi liberta nasaun.
“Iha ona planu maibé konforme ba planu polítika governasaun foun ne’ebé sei mosu liuhosi elisaun parlamentár aban,” Prezidente Autoridade Munisipál Baucau hateten iha Vila Nova, sábadu ne’e.
Munisípiu Baucau iha ona apoia hosi banku Uniaun Europeia kona-ba planu establesementu podér lokál no desentralizasaun administrativa maibé sei liuhosi ekipa avaliasaun hosi governu sentrál.
Planu governasaun atuál hakarak aselera implementasaun podér lokál no desentralizasaun administrativa iha tinan-2024, maibé konforme ba governasaun foun mai importante mak iha vizaun di’ak ba dezenvolvimentu Timor-Leste.
Sentidu hosi restaurasaun katak hafoun fali independénsia uniraterálmente ne’ebé Frente Revolusionária Timor-Leste Independente (FRETILIN) proklama iha tinan-1975 nune’e hetan rekoñesementu hosi mundu internasionál.
Nune’e esperansa ba Timor-Leste liuhosi selebarasaun loron importante refere mak governasaun foun mai aselera liutan dezenvolvimentu hodi redús kiak no mukit nune’e bele tuir objetivu luta ba ukun-aan nian.
Bou-Lesa, argumenta, bainhira halo refresaun durante tinan-21 Timor-Leste seidauk atinje tuir eroi sira-nia mehi katak liberta povu hosi kiak no mukit, maske Timor-Leste nu’udar nasaun independénsia ona.
Tinan-ne’e selebarasaun loron istóriku refere iha munisípiu Baucau realiza simplesmente hanesan isár bandeira no almosu konfraternizasaun tanba relasiona mos ho distribuisaun materiál eleisaun parlamentár iha STAE Baucau.
“Ita halo simples de’it tanba aban eleisaun no ohin tenke distribui materiál eleisaun ba kada sentru votasaun,” Bou-Lesa akresenta.
Partisipa iha selebarasaun restaurasaun independénsia Timor-Leste ba dala-21 iha munisípiu maihosi veteranu, Komandante PNTL Baucau, Komandante komponente terrestre FALINTIL-FDTL, kargu Diretór Serbisu Munisipál inklui estudante ensinu hotu iha Baucau.
Jornalista : Natalino Belo
Editór : Evaristo Soares Martins
