BAUCAU, 20 maiu 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau, sábadu ne’e, distribui ona materiál eleisaun sensitivu no la’os-sensitivu ba sentru votasaun 150.
Diretór STAE Munisípiu Baucau, Natividade Freitas Guterres, esplika, materiál sira sei distribui ba suku 59 hosi sentru votasaun 150 no estasaun votasaun 180 hosi tótal livru boletín votu hamutuk 2.208.
“Ha’u hakarak fó mensajen ba brigada sira katak sira ba hala’o serbisu importante tanba sei nakfilak ba prezidente sentru votasaun, ne’ebé laiha tán ema seluk mak boot liután,” Diretór STAE Munisípiu Baucau hateten iha Vila Nova, sábadu ne’e.
Nune’e brigada sira tenke obedese tuir prinsípiu STAE nian hanesan demokrasia katak livre ba ema hotu atu vota, serbisu tenke ho imparsialidade tanba neutralidade durante atendimentu ho transparánsia.
Durante realizasaun prosesu eleisaun parlamentár tinan-ne’e sei akompaña hosi obervadór nasionál no internasionál, fiskál partidu polítiku inklui sei supervizona hosi Komisaun Nasionál Eleisaun (CNE, sigla portugés).
“Presiza serbisu ho neon no tenke iha nasionalismu forte, hadomi ita-nia rain, brigada ida sei reprezenta nasaun bainhira sala eleisaun iha Timor sei la susesu,” Natividade Guterres enkoraja.
Natividade Guterres husu fiskál partidu polítiku sira atu labele hamosu dezentendimentu durante eleisaun parlamentár no uza direitu rua bainhira la satifaz durante prosesu tomak hanesan hato’o direita ba prezidente sentru votasaun inklui halo reklamasaun.
STAE Baucau utiliza transporte sira hanesan marka governu iha Autoridade Munisipál hamutuk 35, hosi nasionál 10-resin inklui aluger hamutuk 25 hodi transporta materiál eleisaun ba kada sentru votasaun.
STAE Baucau rejista sentru votasaun 150 no estasaun votu hamutuk 180 hosi tótal brigada na’in-150 no ofisiál eleitorál hamutuk 1.800 hosi tótal eleitór 99.158.
Jornalista : Natalino Belo
Editór : Evaristo Soares Martins
