LIQUIÇA, 20 maiu 2023 (TATOLI)– Sekretariadu Tékniku Administrasaun Eleitór (STAE) Munisípiu Liquiça halo distribuisaun materiál eleisaun ba sentru votasaun 85 antes loron Eleisaun Parlamentár (ElPar) 2023 ne’ebe sei halao aban (21 maiu).
Diretór STAE Munisípiu Liquiça, Mario dos Santos Martins informa, STAE Liquiça hahu halo transporta material sensitivu no la sensitivu ba sentru votasaun 85 no Estasaun Votasaun 106. Knaar boot ida ita nia estadu, povu Timor-Leste no governu fo mai STAE liu-liu ba brigada sira atu assume knaar ne’e ho responsabilidade.
“Ita hala’o knar ida ne’e kabe ba lei no la kumpri orientasaun husi ema ka grupu ruma ba ita nia knaar ne’e rasik, labele rona ema seluk, ita nia knaar ne’e sei hetan seguransa husi PNTL ne’ebe sei asegura prosesu ne’e,” dehan Diretór Mario, ba Tatoli iha STAE Liquiça, sabadu ne’e.
Nia esplika, orgaun hotu presiza hatene nia resposanbilidade tantu fiskais partidu politiku, observador nasional no internasional inklui media no PNTL rasik hodi hamutuk asegura proses hotu lao ho diak.
Diretúr Jeral Komisaun Nasional ba Eleisaun (CNE -sigla portuges), Deolindo Ramos afirma estadu gasta ona osan kuaze milliaun $8 ba ElPar 2023 nune’e presiza atensaun husi parte hotu liu-liu ba CNE, STAE no PNTL atu kopera hamutuk.
“Estadu gasta ona osan lubuk ida milliaun $8 ba eleisaun nune’e ida ne’e nesesita ita nia responsabilidade para garante,” nia hateten.
Komandante PNTL Munisípiu Liquiça, Umbelina dos Santos husu ba membru PNTL tomak nafatin lao tuir regra no labele abandona sentru votasaun ou husik brigadista sira mesak hodi ba vizita fali uma sira besik.
“Labele buka fali fatin ka abandona sentru votasaun, membru PNTL tenke hamutuk ho brigadista, la autoriza dezloka ho transporte privadu, membru PNTL labele husik liu sira ne’ebé uza atributu ne’ebé bandu ona ba sentru votasaun,” Umbelina dos Santos deklara.
Iha fatin hanesna Administrador Munisípiu Liquiça, Pedro Paulo Gomes mos husu ba eskipa hotu ne’ebé servisu ba ElPar 2023 atu bele garantia transaparensia no imparsial no tenke mantein servisu no lei no ordem.
STAE Liquiça simu ona material sensitivu no la sensitivu iha loron 12 maiu 2023 ho total kaixa 11 (Boot 10, Kiik 1) ho livru iha 1182 ne’ebé kontein buletim votu hamutuk 59.100.
Munisípiu Liquiça iha sentru votasaun 85, estasaun votu 106, Eleitór hamutuk 53,084 ne’ebé kompostu husi Postu Adminitrativu tolu (3), no Suku 23.
Atividade ne’e rasik hetan partisipasaun maximu husi misaun observasaun sira hanesan Resistência Nacional dos Estudantes de Timor-Leste (RENETIL), Justiça e Paz e Integridade da Criação – Observador da Igreja Para os Assuntos Sociais (JPIC – OIPAS) no CNE.
Jornalista : Cidalia Fátima
Editora : Armandina Moniz
