“Ukun-an tinan 21 ona maibé dezenvolvimentu la’o iha fatin de’it”
MANATUTO, 20 maiu 2023 (TATOLI)—Timor-Leste restaura nia independénsia ba dala-21 (20/05/2002-20/05/2023) ona maibé povu seidauk sente benefísiu hosi ukun rasik an liuhosi dezenvolvimentu.
Notísia Relevante: Tinan 20 Restaurasaun Independénsia, Timor-Leste sei depende importasaun husi rai liur
Negosiante ikan iha Manatuto, Júlio Inácio Soares, hateten dezenvolvimentu iha Timor-Leste ne’e la’o iha fatin de’it, nune’e nia husu ba líder nasionál sira kria pás no estabilidade atu nune’e halo dezenvolvimentu ba rai no povu ida-ne’e.
“Ita haree dezenvolvimentu iha ita-nia rain ne’e ladún la’o, dezenvolvimentu la’o iha fatin de’it,” negosiante ikan, Júlio Inácio Soares, hateten ba Agncia Tatoli iha Manatuto, foin lalais ne’e.
Dezenvolvimentu atu la’o ho di’ak, nia dehan, presiza líder nasionál sira hamutuk atu bele lori liberta pobu hosi mukit.
“Ami mak moris ho negósiu kiik, nune’e dezde tempu Indonézia to’o agora, liuhosi ida-ne’e mak ami hodi sustenta ba ami-nia oan no família uma-laran,” nia hateten.
Tanba ne’e, nia husu ba Governu foun ne’ebé atu mai tenke ho programa prioridade sira, liuliu kria fatin ba negósiu ikan nune’e negosiante ikan sira bele faan ho dignu no moris ho hakmatek.
“Ha’u husu Governu foun mai ne’ebé sei lidera hosi sé de’it, ami hakarak mak boot sira tenke kria pás no estabilidade ba rai ida-ne’e. Rai no ami povu kiik ne’e presiza fatin ne’ebé hakmatek, laiha violénsia, laiha diskriminasaun grupu ida ho seluk ka entre kór no seluk tan. Importante mak fó ami fatin, nune’e ami bele faan ho hakmatek,” nia dehan.
Nia hateten, Governu mai tenke tau prioridade ba negosiante sira tanba negosiante ikan to’o agora laiha fatin própriu hodi faan sira-nia ikan.
Peskadór Domingos Sávio Carvalho Gomes rekomenda ba Governu foun ne’ebé sei mai ne’e presiza tau prioridade ba asuntu peska nian.
“Ami peskadór hakarak ne’e haree mós ami povu kiik ne’ebé tinan barak ona moris ho peska, maibé laiha Governu ida mak tau-matan no kria kondisaun ida mai ami,” nia dehan.
Jornalista : Osória Marques
EDitór : Cancio Ximenes
