Abitante Bazartete husu Governu foun kumpri promesa eleitorál

Liquiçá, 21 maiu 2023 (TATOLI) – Iha sekuénsia eleisaun lejislativa tinan ne’e, abitante husi suku Mota-Ulun, postu administrativu Bazartete, munisípiu Liquiçá, husu ba Governu foun hodi kumpri promesa eleitorál hodi hadia infraestrutura no saneamentu báziku.

Felix da Costa, abinte husi suku refere sujere ba Governu foun atu kria programa sira ne’ebé fó benefísiu direta ba povu hanesan infraestrutura bázika, liuliu estrada, eletridade no bee moos, tanba iha fatin barak asesibilidade ba estrada ne’e laiha hodi difikulta komunidade faan sira nia produtu iha merkadu inklui asesu ba saúde no edukasaun.

“Komunidade sira ne’ebé hela iha tasi ibun to’o agora susar atu asesu ba bee moos, barak liu ne’e sosa husi kareta kada 1.000 litru ho $25.00 to’o $30.00. Ne’e mak realidade ne’ebé ami enfrenta. Partidu polítiku sira labele sae iha palku leten gosta de’it mak halo promessa, maibé hafoin ka’er tiha Governu la realiza”, Felix da Costa dehan baTatoli hafoin ezerse direitu votu, iha eskola Sekundária Filál Bogoro, suku Mota-Ulun, ohin.

Tanba ne’e, nia husu ba Governu foun tenki tau mós prioridade ba joven sira liuhusi kria kampu traballu hodi evita joven envolve iha konflitu.

“Joven barak mak halai ba servisu iha rai liur, tanba iha ita-nia rai ne’e kampu servisu laiha. Entaun Governu ida mai ne’e persiza mós dada investór sira husi nasaun seluk atu mai loke indústria iha rai laran hodi fó servisu ba joven sira hodi evita konflitu”, nia rekomenda.

Felix de Jesus sujere mós ba Governu foun atu estabelese sentru formasaun bara-barak hodi insentiva joven aumenta sira-nia kompeténsia pesoál hodi kompete iha merkadu traballu.

Iha fatin hanesan, Miguel da Conceição, iha espetativa bo’ot ba governasaun foun atu hadia estatutu profesór hodi garante kualidade edukasaun iha Timor-Leste.

“Ita koalia kona-ba kualidade edukasaun, tenki haree fatór tolu, kualidade ensinu, profesór no estudante. Há’u hein Governu foun ida ne’ebé sei mai tenki hadia lalais estatutu profesór sira-nian hodi garante kualidade edukasaun”.

Tuir observasaun Tatoli, eleisaun parlamentár iha suku Mota-Ulun hetan seguransa husi Polísia Nasionál Timor-Leste, munisípiu Liquiçá, FALINTIL Forsa Defeza Timor-Leste (F-FDTL) no supervisiona husi organizasaun intergovernamental husi nasaun sira ne’ebé afetadu ba konflitu (g7+, sigla iha inglés), inklui Komisaun Nasionál Eleisaun (CNE, iha portugés)  ho fiskál sira husi partidu polítuku.

Jornalista: Afonso do Rosário

Editora: Isaura Lemos de Deus